Garahe

Sa kaulohan, ilabi na sa Metro Manila, usa sa nakita nga nakatampo og daku sa kahuot sa trapiko, labi na sa EDSA, mao nga daghang nanag-iya og sakyanan ang wala’y garahe. Ang resulta, ang kadalanan maoy gihimo nila nga garahe.

Most probably mao usab kini ang nahitabo sa atong dakbayan. Ilabi na sa mga side streets. Atong makita nga daghan kaayo ang mag-park, sa uban, gihimo na nila nga garahe.

Ang mga side streets mahimo unta nga mga alternative routes sa mga sakyanan, both private ug public.

Sa Quezon City, si Mayor Herbert Bautista, miuyon sa proposed ordinance nga dili baligyaan ang buot manag-iya og sakyanan nga wala’y garahe.

Sa ato pa, kun wala kay garahe sa inyong balay, dili ka makapalit og kotse o bisan unsa nga sakyanan.

Nindot. Gisugyot ni Bautista nga ilakip ang mga public utility vehicles (PUVs). Maayo nga i-adopt usab kini sa mga dagko’ng dakbayan sa tibuok nasud.

Dinhi sa atong dakbayan, daghan kaayo nga kadalanan ang gihimo nga parking spaces, both sa mga pribado ug publiko nga mga sakyanan.

Ug tungod kay inutil man ang atong gobiyerno bahin sa pagpatuman sa mga traffic rules and regulations, wala kita’y mahimo batok sa ilegal nga pag-park sa mga sakyanan. Kutob lang g’yud ta sa pagreklamo.

So, padayon ang mga illegal parking sa atong kadalanan, padayon ang paghimo sa atong kadalanan nga garahe, padayon ang wala’y kasulbaran nga problema sa trapiko … ug igo lang ta sa pagpanghupaw.

Si Atty. Jerome Neri misugyot nga sama kuno sa airline industry, ang mga driver sa mga sakyanan sa kadalanan, una kahatagan sa driver’s license, kinahanglan motapus una og formal driving course, diin dili kay tudloan lang sila unsaon pag-drive, kondili, ila g’yud nga ma-internalize ang mga driving rules, regulations, ug labaw sa tanan, ang etiquette sa kadalanan.

Road courtesy, wala kini sa atong mga driver, labi na sa mga PUVs, hinungdan nga mahitabo ang paugatay, over speeding, ug overtaking. And again, helpless ang atong gobiyerno batok ning maong pangabuso sa kadalanan … as if wala kita’y gobiyerno.

Atong kutloon si Atty. Neri: “First and foremost, we need quality drivers. Many drivers on the road right now simply do not know the rules and etiquette of driving, and this ignorance is a major cause of congestion and accidents.”

Tinuod. Apan, maayo ‘sab tingali nga mo-undergo pud ang mga traffic enforcers sa formal nga kurso on traffic rules, regulations and etiquette.