Kahimsog ni Senador Santiago

Dili ikalalis nga aduna pa’y daghang dumadapig si Senador Miriam Defensor-Santiago.

Ang iyang mga political supporters nangalipay sa pagsang-at niya sa Certificate of Candidacy pagka-presidente. Kini maoy ikatulo na nga higayon nga misuway si Senador Santiago paglansar pagka presidente.

Sa labing una niya nga pagsuway niadtong 1992 nga presidential elections, daghan ang nagtuo nga si Santiago ang modaog batok ni kanhi presidente Fidel Ramos.

Gamay ra ang labaw ni kanhi presidente Ramos batok ni Santiago. Sa 5,342,521 botos nga nakuha ni Ramos, ang nakuha ni Santiago 4,468,173 botos. Wala ra makaabot og usa ka milyon ang labaw ni Ramos.

Hingpit na nga gidesisyonan sa Korte Suprema nga si Ramos maoy nidaog sa piniliay. Apan hangtud karon dili pa kini madawat ni Senador Santiago.

Apan sa iyang ikaduha nga pagsuway sa presidential elections niadtong 1998 batok nila ni kanhi Presidente Joseph Estrada, House Speaker Jose de Venecia, anhing Senador Raul Roco, kanhi Gov. Lito Osmeña, kanhi mayor Alfredo Lim, Senador Juan Ponce Enrile ug uban pa, nihagba pag-ayo ang popularidad ni Santiago kay nangiwit siya ug wala na gani niabot sa usa ka milyon ang botos nga iyang nakuha.

Nikalit sa pagkaluya ang agresibo nga politikanhong karera ni Senador Santiago. Hinoon, nakabalik pa siya sa Senado hangtud karon. Si Santiago ang maghatag og alegre ingon man kolor sa makaduka ug makalaay nga proseso sa mga Senate Inquiry. Dili magpanuko si Santiago sa pagpangasaba, pagpanginsulto ug mopagawas pa gani sa mga magsaba-saba ug mopa-contempt sa mga saksi nga mamakak.

Bisan kun dali na kaayo nga maglagot si Santiago ug magsige ra sa pagpangasaba sa mga session sa senado, makahimo gihapon siya sa pagpakatawa.

Daghan ang nidayeg sa iyang mga practical joke nga iya na nga gihimoan og libro --- ang "Stupid is forever".

Sa edad nga 70 anyos, gusto pa nga pamatud-an ni Santiago nga makahimo pa siya sa pagpadagan sa nasud—nga iyang gihulagway nga napalibotan sa daghang mga kurakot.

Kini bisan pa kun gikwestyon ang kahimsog sa panglawas ni Santiago human niya giangkon nga aduna siya’y lung cancer.

Kapin sa tuig nga nag-leave sa senado ang senador tungod sa maong sakit. Gani iya na nga gibalibaran ang pagka-huwes unta sa International Tribunal.

Apan pipila ka adlaw sa wala pa ang deadline sa filing sa Certificate of Candidacy, gipahibawo sa senador nga modagan siya pagka presidente kay hingpit na siya nga naayo.

Ang runningmate ni Santiago mao si Senador "Bongbong" Marcos. Samtang gikwestyon ang kahimtang sa panglawas ni Santiago, iyang gipasigarbo nga sa teknolohiya karon, ilabi na sa social media, wala siya mauwahi.

Gani sikat siya sa social media ug tungod niini dili na kinahanglan nga magpainit pa siya aron mangampanya. Matud sa senador, kun may kuwarta ka lang sigurado ka nga maayo sa imong sakit ug malugwayan pa ang imong kinabuhi.