Requiescant in pace, daddy Nito Jabat

Gitay-og ang akong kalibutan sa balita niadtong Domingo nga mitaliwan na ang akong “amahan, magtutudlo, boss, ninong, ug higala” --- ang journalist nga si Juanito V. Jabat.

Kanhi seminarista ko nga nangaplay pagka-koresponsal sa Banat News. Gidawat ko niya ug nahimo nga reporter. Human sa lima ka bulan, gihangyo ko niyang motabang og edit sa mga balita. Mibalibad ko kay wala ko’y kasinatian, apan iya ko nga gilingkoran hangtud nakakat-on.

Miligid ang tuig nga kami’ng duha ni Mr. Jabat ang nangita og mga konsepto – gamit ang pila ka dekada niya’ng kasinatian sa pameryodiko ug ang akong pagkamadukidukion.

Gisuhid ko ang mga magbabasa unsa’y ganahan nila sa ilang basahon, samtang si Mr. Jabat ang mo-final unsa ang among masabotan nga konsepto base sa rekomendasyon sa mga tawo. Ang nakanindot kay ang among presidente kaniadto nga si Sir Jiji Gullas, mosuporta sa among kawsa.

Si Mr. Jabat ang dagway sa usa ka sadya, mapahiyomon ug mapahiubsanon nga lider sa Banat News. Siya ang among editor- in- chief ug publisher, apan usa ka leksiyon ang iyang gitisok kanako isip iyang tinudloan ug kaabag nga editor.

“Imong buhat ang pasultiha kinsa ka, ayaw ang imong baba ang patrabahoa.”

Karon nga wala na siya, handumon ko siya sa hangtud, sama sa paghandom nga makausa, kami’ng duha ang naglambiyong pagpalambo niining Banat News.

Sir Jabat, requiem aeternam dona eis, Domine, et lux perpetua luceat eis. Requiescant in pace. Amen.

* * *

Aduna na diay bag-ong tigpamaba ang kampo ni Grace Poe. Sumala sa Twitter niadtong Oktubre 15, si Kongresista Sherwin Gatchalian na ang mosulti alang kang Grace. Wala pa g’yud ko makakita ug makadungog niining Gatchalian. Didto sa Kongreso, miyembro man kini si Gatchalian sa “lingkod gang” kay igo ra man kining molingkod ug wala’y partisipasyon sa mga debate.

Daghan man unta og tawo ang Nationalist People’s Coalition apan nganong si Gatchalian pa man? Timailhan ba kini sa krisis sa mga lider sa kampanya ang kampo ni Grace?

Usa pa, dili man kini orihinal nga ka grupo ni Grace si Gatchalian kay didto man kini magkuyogkuyog kang Bise Presidente Jejomar Binay.

Gani, gianggaan man kini og “lipatbahay” kay sa diha nga mikalit og kasikat si Grace, dali kaayo siya nga nakabiya ni Binay. Ang akong gikuyawan niini, si Gatchalian ra ang magpunay og hunghong sa kampo ni Binay sa mga sekreto sa kampo ni Grace.

Usa pa, si Mayor Erap Estrada suod kaayo sa iyang amahan nga si William Gatchalian. Si Erap hadlok mosuporta ni Grace o Binay kay kun makadaog si Mar Roxas, kuyaw madugta sa prisohan ang iyang anak nga si Jinggoy.

Wala ba kaha masayop si Grace pagkuha kang Gatchalian isip tigpamaba sa iyang kampanya?