El Niño nga mura'g La Niña

Ingon niini ang nahitabo karon sanglit wala pa man g’yud nato mabatyagi ang epekto sa dugay na nga gipaabot nga El Niño phenomenon.

Kaniadto ra gipahibalo sa Philippine Atmospheric Geophysical and Astronomical Services Administration (PAGASA) nga makasinati kita og El Niño.

Gani gipahimangnoan kita sa grabe’ng epekto niini sa kinabuhi ug panginabuhian sa katawhan. Dugay ra nga gideklarar ang Sugbo ubos sa State of Calamity ang lalawigan sa Sugbo aron mapangandaman ang problema nga mugna sa El Niño.

Kini ilabi na sa mga mag-uuma nga maoy direkta nga maapektohan sa huwaw. Dili man ako eksperto sa pag-analisar sa weather condition, apan base sa akong personal ug yano nga obserbasyon sa atong palibot, wala pa g’yud nato masinati ang nanghinubra nga kainit o ang gikahadlokan nga taas nga huwaw.

Gibana-bana kaniadto sa mga eksperto nga labing seguro mabatyagan ang ting-init sukad pa sa Agosto, Septiyembre ug labing seguro na karong buwana sa Oktubre.

Apan imbes huwaw ang masinati, ang naghinubra na man hinuon   nga tubig ang nahiagoman sa katawhan mugna sa sagunson nga bagyo nga miigo sa nasud niining milabay’ng mga adlaw.

Kini sama sa bagyo'ng Lando nga mikusokuso pagmaayo sa Luzon ug uban nga bahin sa nasud nga nakamugna og grabe’ng baha.

Mura’g sukwahi hinuon ang epekto diin ang El Niño nga mosangpot unta og grabe’ng huwaw o ting-init, samtang ang La Niña nga mosangpot unta sa grabe nga uwan mao na man hinuon ang nahitabo   karon.

Dili man kay gilaay ako pagpaabot sa El Niño kay angay man gani kita nga magpasalamat nga wala pa mahitabo ang gikahadlokan nga kahimtang sa panahon nga mao ang ting-init, apan nagtuo ko nga usa kini ka tilimad-on nga lisud na kaayo basahon ang tinuod nga kahimtang sa panahon ug bisan ang mga weather experts dili na makabana-bana.

Kun ingon naman niini ka grabe ang epekto sa Climate Change mas maayo seguro nga dili lang ang kainit o huwaw ang pangandaman kun dili apil usab ang mga gamhanan nga bagyo nga posible'ng atong mahiaguman.

Gipasabot na sa PAGASA nga ang panahon sa El Niño gidunganan usab sa mga gamhanan nga bagyo nga mosulod sa Philippine Area of Responsibility kada tuig. Mas maayo nga andam kita dili lang sa El Niño ug La Niña kun dili sa mas grabe pa nga panimalos sa kinaiyahan gumikan sa pagkagusbat na sa atong kalikopan.