Buotan nga wa’y kalibotan

Dili na magpapili si kanhi gobernador Lito Osmeña isip labing taas nga opisyal sa probinsya sa Sugbo tungod sa rason nga tiguwang na ang iyang mata.

Gipahibawo usab ni Osmeña ang iyang pagsuporta sa kandidatora nila ni Atty. Winston Garcia ug kanhi kongresista Nerisa Soon-Ruiz pagka gobernador ug bise gobernador.

Si Lito Osmeña maoy gobernador sa Sugbo niadtong 1988 hangtud sa 1992 ug siya ang responsable sa pagkabaniog sa Sugbo nga Ceboom tungod sa pagsulbong sa iyang ekonomiya.

Matud ni Lito O nga dili niya masuportahan si Gobernador Junjun Davide tungod kay bisan kini buotan, apan walay kalibotan ug kun ugaling mao lang gihapon kini ang gobernador sa Sugbo, walay kalamboan ang probinsya.

Nagtuo si Lito O nga kun unsa man ang nahimo ni Davide sa miaging tulo ka tuig niya nga termino mao ra gihapon kini ang iyang himuon kun makadaog siya pag-usab.

Kun imong sabton, mura’g gusto nga ipasabot ni Lito O nga walay nahimo para sa lalawigan sa Sugbo si Gobernador Junjun Davide. Hinuon ang mga dumadapig ni Davide puwede nga modepensa pinaagi sa pag-ingon nga dili katuohan ang gipanulti ni Lito O kay bunga lang kini sa tiguwang na niyang mga mata.

* * *

Kun wa’ pa kamo malimot, akong gihagit sa akong programa sa radyo ug sa akong lindog niadtong miaging semana, nga  magpapili pagka senador kadtong mga gituohan nako nga adunay katakos ug kaligdong sa pagpangalagad.

Usa nila mao si Atty. Levi Baligod, ang abogado nga anti-graft crusader ug abogado sa mga whistle blower sa pork barrel scandal nga nakapapriso sa mga senador, kongresista ug Janet Lim Napoles.

Ako nagpasalamat nga naminaw seguro siya sa akong programa sa radyo ug mibasa sa akong panahom ning Banat News kay sa kataposang adlaw, miduso kini og Certificate of Candidacy pagka senador. Kumbati Atty!