Courtesy call sa Ginoo

“Seek ye first the kingdom of God, and his righteousness; and all these things shall be added unto you” -- Matthew 6:33-

Nindot paminawon ug tan-awon nga kini ang gihimong tamdanan sa mga politiko nga mohapit g’yud sa simbahan una moadto sa Commission on Elections aron pagduso sa ilang certificate of candidacy.

Nagpasabot lang kini nga nangayo sila og guidance sa Labaw nga Makagagahom sa gitinguha nila nga makaserbisyo sa katawhan sa higayon nga makalingkod na sila sa puwesto sa kagamhanan.

Apan ang pangutana kun sinsero ug kinasing-kasing ba kaha ang ang ilang pag-courtesy call sa Ginoo? Pwera sa maayo, subo palandungon nga gihimo na kini sa ubang politiko nga gimmick aron makakabig og suporta gikan sa mga tawo nga mobotar kanila sa umaabot nga eleksyon.

Gani mawagtang na ang ka solemne sa pagsimba tungod kay nalimot naman sila sa real essence sa gipangayong spiritual guidance sanglit gipasulabi nila ang kahigwaos sa ilang yutan-on nga political ambition nga mismo sa sulod sa simbahan o atubangan sa altar na mohimo og eksina nga dili g’yud unta angayan nga himoon tungod sa ka sagrado niini. Ang tawo nga tinuod nga nagtamod sa iyang Espirituhanon nga tinuohan dili na kinahanglan nga buyagon pa sa mga opisyal sa simbahan kun unsa’y angayan, ug dili angayan, nga himoon sulod sa balay alampoanan.

Ang uban gani nga kandidato mohapit sa simbahan sa pagtuo nga swertehon ang ilang kandidatura kay nagtuo na sila nga nabolatikan na nila ang Ginoo. Nagpakita lang kini kun unsa kahakog sa gahum ang tawo kinsa wala’y katagbawan nga kinahanglan pa nga gamiton ang templo sa Labaw nga Makagagahom aron makaseguro sa ilang kadaugan. Kun ingon naman lang niini ang katuyoan sa pagsulod sa simbahan, ayaw na lang kay segurado nga mao kini ang maghatod sa usa ka kandidato sa iyang kaparotan.

Apan alang niadtong sinsero nga mihalad sa ilang Diniyos nga tinguha sa pagserbisyo pinaagi sa pagpatigbabaw sa respeto, ang Ginoo na ang moganoy kaniya ngadto sa kadaugan!