Lahi ang ngalan sa birth certificate

Dear Atty. Divine,

Duna ko’y problema bahin sa akong pangalan. Ang akong tanang records gikan sa Grade 1 hangtud sa College lakip na ang akong driver’s license , marriage contract , birth certificate sa akong mga anak , ang pangalan nga naa sa baptismal ang akong gisunod. Apan ang akong pangalan sa birth certificate sa NSO, lahi diay ug karon lang ko masayod niini. Lakip na ang place of birth wala magtakdo. Puwede ba attorney nga magpa late register ko aron ang akong mga records tanan dili mausab ug magpabilin ang akong pangalan nga anaa sa baptismal? Puwede ba attorney nga dili ko mo-follow sa NSO birth certificate? — Editha

Dear Editha,

Dili lang ikaw ang adunay problema susama niana apan ang sulbad dili ang pagpa late registration kay magdoble ang imong rehistro ug inigkuha nimo sa imong Birth Certificate ang first nga narehistro mao g’yud gihapon ang mogawas. Ang imong buhaton mao ang pagpasaka og Petition for Change of First Name ngadto sa Local Civil Registrar diin ka marehistro. Imong usbon ang panga’n sa imong Birth Certificate sa NSO ug ilisan sa pangalan nga maoy imong gigamit sa tanang dokumento. Kun nasayop ‘sab ang place of birth, iapil ‘sab nimo pagpa correction sa imong Birth Certificate. Ang imong buhaton karon mao ang pangangayo og listahan sa Local Civil Registrar sa mga dokumento nga imong i-submit  kanila alang sa imong pagpa-usab sa panga’n. Importante nga mausab ang imong pangan sa imong Birth Certificate kay kun mokuha ka og passport ang NSO Birth Certificate ra ba g’yud ang ilang pangayuon sa DFA. Thanks and God Bless. – Atty Divine

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa atong column mata’g Miyerkules, Sabado ug Domingo, so katulo sa usa ka semana na ninyo mabasa ang Legal Corner.