Maabiabihon nga pagkatawo

Way kasudlan sa kahinangop, dihang naghimamatay kami uban sa akong kababata nga klasmet nako sukad pa sa elementarya, nga dugay na diay miretiro sa pagkamaestra. Bisag silingan namo siya apan tagsa ra gyud mi magkita gumikan lagi sa kabese nato sa inadlaw nga kalihokan.

Gidapit ko niya sa iyang opisina sa lai'ng departamento ug didto daklit ko siya'ng nahinabi mahitungod sa iyang kinabuhi. Sa akong nakita niya, morag nagpabilin nga way kausaban sa kanhiay sa iyang kabatan-on nga hangtud karon nga edaran na, anaa gihapon ang kinaiya nga mahinangpon, mapahiyumon ug abli kanunay ang kaugalingon sa pagtabang  ilabi na niadtong modangop kaniya.

Talagsa mo ra makita sa tawo ang sama niya'g kinaiya, nga dili taphaw makig-atubang sa isigkatawo. Malipay siya'ng makahatag pabor sa uban. Kasaligan siyang malauman kun unsa'y mailagad niya kanimo. Dili siya buot nga may makita'ng tawo nga naagrabiyado. Unsa ma'y mga oportunidad, dili ni siya makaako nga kumkomon lang ang para sa iyang kabulahanan.

Subra na tingali ang pagbilib ko's hiyas sa tawo nga ingon niini. Apan di sab kalikayan nga ato kini kakuhaan og ehemplo sa kinabuhi. Kay kun kini ato pa'ng mapalabwan ang ingon ini'ng positibo'g gawi nga maayo moagni ug mopabatyag nga mabination sa isigkaingon aron pagpabaskog sa mga naluya na's pakigbisog.

Dili ko mailarawan sa hingpit ang pagka-maabiabihon niya, nga mas maayo mahimamat mo siya. Sulaye og bisitahe, basin nasayop ko sa paghimo niya'g sumbanan sa katarong, ang maalagaron nga mao'y tipik sa iyang kaakohan. Kun may panginahanglan mo, ilabi na naa mo sa kabaranggayan sa Cebu City, adtoa ang opis sa BAEX sa City Hall aron magiyahan ug matubag ang inyo'ng katuyoan. Nga ang pahiyum ni Mam Inday Dino,  mao'y moabiabi kaninyo.