Bin-Go! UNA pa?

UNA na, Bin-Go pa! Mao kini ang singgit ni Bise-Presidente Jejomar Binay sa paglusad unta dinhi sa Sugbo sa ilang tandem ni Senador Gringo Honasan nga wala motunga niadtong Biyernes.

Nakamuntar sa stage sa Cebu Coliseum ang dagko’ng tarpaulins sa dagway nilang Binay nga may tatak presidente ug kang Senador Gringo Honasan pagka bise-presidente.

Ang ilang dagko’ng tarpaulin maoy mosugat sa panan-aw sa gibanabana nga 700 ka local leaders sa UNA sa Kabisay-an nga manumpa ug motambong unta sa paglusad dinhi sa Sugbo sa kandidatura nilang Binay ug Honasan. Apan daghan ang natingala ngano nga wala’y Senador Honasan nga mipatim-aw.

Matud ni Senador Tito Sotto, suod nga higala ni Honasan, nga wala pa g’yud hingpit nga nakahukom si Honasan kun iya ba nga dawaton ang tanyag ni Binay.

Diha nga gipangutana usab si Binay kun ang nakatatak sa tarpaulin ni Honasan nga bise-presidente kompirmado na ba, nunot sa wala niya pagtunga, mitubag si Binay nga wala siya makabantay nga may tatak diay nga bise-presidente ang tarpaulin ni Honasan.

Wala kuno siya makakita niini tungod sa kadaghan sa tawo.  Iya hinoon nga gitumbok ang mga lokal nga tigpasiugda sa kalihukan nga maoy nagpa-imprinta niini, busa wala siya makahibawo.

Gipasalig ni Binay human siya gipiit sa pagpangutana, nga sa Lunes, Oktubre 12, atol sa una nga adlaw sa pagsang-at sa Certificate of Candidacy sa tanang mga mokandidato sa election sunod tuig, iya na nag ipahibawo ang senatorial line-up sa UNA lakip na sa iyang runningmate.

Kun kaniadto sa labing una nga mga tuig sa termino ni VP Binay sayo ug sayon ra kaayo niyang gipahibawo ang iyang pagdagan sa 2016 elections karon, human sa daghang kontrobersiya ug pasangil sa grabe nga kurapsyon batok niya ug sa iyang pamilya, naglisod ug sama sa gilikayan si Binay sa iyang mga gipangulitawhan.

Si Senador Ferdinand "Bongbong" Marcos nga anak sa diktador nga si kanhi presidente Ferdinand Marcos nibalibad sa tanyag ni Binay ug nitataw nga dili sila magkaabot sa ilang klase sa pamolitika.

Nisuway usab unta si Binay sa pagpangulitawo ni Senador Grace Poe diha nga wala pa’y klaro ang senador kun modagan ba o dili pagka-presidente.  Apan, gibalibaran usab si Binay.

Mura'g nahutdan na sa iyang mga alas si Binay nga sa iyang ka wala nay kapaingnan niduol na lang ni Bongbong Marcos, ang anak sa kanhi diktador diin siya sa iyang pagkabatan-on isip human rights lawyer nakigbisog batok sa pangabuso sa amahan ni Bongbong nga si Ferdinand Marcos.

Karon, mura og nagduha-duha pa si Senador Honasan kun mosugot ba o dili sa tanyag ni Binay. Hinoon maklaro g’yud ang tanan karong adlawa sigon sa saad ni Binay.

Kun, dili pa gani gihapon makahukom si Honasan karong adlawa, duna pa siya’y higayon hangtud sa Oktubre 16, sa pagtapos sa filing sa COC, sa pagtimbang-timbang. Maka-bingo pa kaha ang Bin-Go?