EDITORYAL - Usab-usab ang kolor

Hinay-hinay nang nagusab-usab ang kolor sa mga politiko dinhi sa Sugbo samtang nagkaduol na ang filing of certificates of candidacies sunod semana. Bisan dili panghinganlan kining maong mga politiko, nakaila kanila ang kadaghanan sa mga botante nga nakabotar sa nakalabay nga duha ka eleksyon. Mao kini ang usa sa mga bentahe sa usa ka demokratikanhong nasud, mahimo kang makapili og pundok kun hain ka gusto ilabi na kun ang politiko adunay daghang supporters.

Ang nakabati lamang niini, mapasanginlang mga way baruganan ang mga politikong nagtabok-tabok og partido.  Ang tawag niini 'political survival' sa mga politiko nga gustong magpabilin sa gahom ug mahitabo kini kinahanglang adto sila modapig sa dumadaog nga grupo.

Kay gusto ba kaha nilang magpabilin aron makahatag pa og mas maayong serbisyo publiko o sa uban pang rason.

Nagsugod kining 'tabok-tabok' diha sa mga national political parties ilabi na kadtong mga walay kandidato sa pagka-presidente o bise presidente. Gitawag nila kini nga kowalisyon, kaalyado ug aduna pay gitawag nga 'guest candidates' nga mao kasagaran mga kandidatong independente apan kusog kaayo sa ratings. Sa lokal nga mga partido, samot nga makalibog tungod kay nagkuros-kuros ang ilang suporta sa nagkadaiyang lokal nga kandidato ngadto sa mga national level candidates.

Bahala na lang og unsay ilang buhaton kun magtabok-tabok ba sila og partido basta ang importante mao ang tinud-anay nga serbisyo ngadto sa katawhan nganong sila nikandidato.

Maayong tan-awon kun ang mga plataporma sa kada kandidato haom ba o nahauyon ba sa platapormang gisaad sa partido. Kay dili gani ni sila magtakdo, nan, kinahanglang dili na usikan ang boto para niining kandidatoha.

Usahay adunay maayong bunga ang kinaiyang pagkahimantayon ilabi na kun kini may kalabotan na sa kaugmaon sa nasud.