Ang pagpadako sa suso (2)

Sa atong nahisgutan sa miaging lindog, dili na problema ang pagpadaku sa suso, kay duna na'y dagha'ng mga paagi sama sa medikasyon, operasyon ug sa mga natural nga paagi sama sa hustong nutrisyon, ehersisyo ug pagmasahe. Budlay ug hasul kaayo kini'ng mga natural nga paagi, apan luwas ug epektibo nga wa'y 'side effects' ug dili gastoso sa pagmintin kundi ang dedikasyon lang.

Ania ipadayon nato ang lai'ng klase sa ehersisyo sa pagpadako sa suso;

* Chest press — Matang ni sa ehersisyo nga ang 2ka kamot, nagkupot og tagsa ka gagmay nga pabug-at (dumbells), nga kini dili lang palig-on sa bukton, kundi pagpadaku sab ni sa suso nga motugsoy pag-ayo nga dili magbitay.

(a) Pwede ang posisyon mo, maghayang nga maghigda sa bangko. Unya puli-puliha nga ituyhad ang bukton nga paitaas- paubos ang 2ka kamot nga nagkupot og 'dumbells'. Balik-balika kini nga igo maagwanta ang kakapoy.

(b) Pwede sab maghigda maghayang sa bangko o sopa, apan nakaplastar lang ang sampot ug ang likod, samtang ang paa ug tuhod nakaporma nga mora'g naglingkod sa way lingkuranan. Ni'ng posisyona, sa gihapon ipuli-puli pagtuyhad ang bukton paitaas ug paubos. Buhata ni kutob sa maagwanta.

* Rear lateral raise - lai'ng klase ni sa ehersisyo sa pagpadako sa suso. Magbarug kini nga inklinado'g gamay ang lawas nakaakbo sa atubangan nga nakapiko gamay ang tuhod. Samtang nakaposisyon nga nakatuyhad ang 2ka   bukton nga nagkupot ang kamot sa 'dumbells', puli-pulihon kini'ng ituyhad sa atubangan, unya iwaling na sab nga nakadupa saylo sa likod nga igo'ng maabot.

Ayaw kalimti ang pagkao'ng makapahimsog sa pagdaku sa suso, sama sa mga lab-as nga juice sa carrot, ahos ug cucumber. Ug sa prutas nga hinog nga kapayas, apples, strawberry, ug watermelon. Inom sab og greentea ug redwine.