Naglatay sa lugas lanot!

Kini ang kahimtang sa mga tawo nga moagi sa karsada sa Manipis, dakbayan sa Talisay. Dugay na kini nga suliran ilabi kun mokusog ang pagbundak sa ulan nga mosangpot sa grabe nga pagdahili sa yuta ug pagbaha sa sapa.

Niadto lang Miyerkules sa hapon daghan nga mga tawo ang natanggong sa kalit nga bul-og sa baha sa sapa dapit sa Barangay Jaclupan.

Ang water spillway nga bugtong kaagian sa mga tawo padulong sa sentro sa dakbayan sa Talisay ug pabalik sa ilang mga pinuy-anan ang apil sa gilunopan sa baha hinungdan nga wala makalabang ang mga tawo nga napugos paghulat og halos tulo ka oras una mihubas ang baha.

Samtang ang uban nga wala na kaagwanta, mikatkat sa pangpang aron lang makalabang sa pikas tampi ug makapauli sa ilang pinuy-anan.

Wala’y kapilian ang mga tawo kun dili sa pagsugal sa ilang kinabuhi matag karon ug unya. Duna unta’y laing kaagian kun gihapsay pa sa kontraktor nga gikuha sa Department of Public Works and Highways (DPWH) ang mga nakubkob nga mga anapog sa gitrabaho nga karsada.

Naghimo tuod sila og temporary nga karsada sa ubos nga bahin apan peligro kaayo alang sa mga motorista ilabi na ang minantinel nga water spillway tungod kay huyang kaayo nga dali ra gub-on sa tubig.

Bisan iya sa DPWH ang proyekto sa karsada sa naasoy nga dapit apan gikinahanglan usab nga molihok ang kagamhanan sa dakbayan sa Talisay sa pagpangita og sulbad sa problema sa ilang mga molupyo pinaagi sa pagpukpok sa hingtungdan nga ahensya sa pagpadali paghuman sa proyekto.

Apan mas giuna karon sa mga opisyal sa Talisay City ang pamolitika diin wala’y mapili, ang mayor ug mga sakop sa konseho nga mura’g iro ug iring nga kanunay magbugno.

Ang resulta nataligam-an ang serbisyo sa ilang mga molupyo.