Gusto mo’g subra kahinog?

Dili siguro maayo sa usa ka magsisibya o magsusulat nga moendorso og kandidato nga dili gani siya botante sa lugar diin ang iyang gisuportahan anaa magpapili.

Sama niining mga kulumnista sa inyong mantalaan nga nagsige og panaway sa pamilya nga dili angay sawayon ug unya modayeg sa dili angay dayegon.

Usa sa inyong columnist sa Banat News klaro kaayo nga nagbaligya og kandidato pagka-mayor sa Mandaue City nga kuno daghang mga tawo nga nagtuboy ug nag-awhag nga padaganon kini pagka-mayor.

Tingali pareho usab niya ang taktika nga kuno giatangan siya sa mga dumadapig usa ka lawom na nga gabii ug nag-aghat kaniya nga padaganon pagka konsehal sa barangay apan ang resulta, nahagba.

Hayahay kaha ning tawhana no kay dili na maglisod pagdagan kay wala na’y problema sa campaign materials. Daghan gud ni siya og gituboy bisan gani sa siyudad sa Sugbo.

Pareho ra gayud ni siya sa usa ka konsehal sa siyudad, nga usa ka abogado, nga usa ra ang ilang giila nga Ginoo sa politika. Unsa kaha ang dag-anan niining mao nga abogado nga last term na man niya karon, congressman sa norte?

Naa may dili magpapuli diha. Siguro mobalik ni pagka-barangay kapitan kay gasige na man kini og babag sa mga kaayohan sa siyudad basta suguon.

Balik ta sa Mandaue City, iyang gisigehan og saway ang ligdong nga pamilya nga gipasidunggan man gani sa Mandaue City nga apil sa Top 10 Taxpayers. Ang mga Quisumbing daghang pamilya ang natabangan.  Karon, lain na ‘sab ang gibirahan. Si Grace Poe nga wala kuno’y kabangkaagan. Hilaw pa kuno nga modumala sa kagamhanan.

Naa man bitaw mga hinog na sama nila ni kanhi Presidente Estrada ug ni kanhi Presidente Arroyo pulos man gikiha og graft and corruption. Unya mao na ang inyong gusto, kanang overripe na?