Hiyas sa maayong lider

Suwerte kaayo ang uba’ng mga tawo nga gikan sa iyang pagkahimugso, nagbaton na’g hiyas sa usa ka lider.  Kadaghanan wala  gipakatawo nga lider, apan mahimo kini’ng katun-an segun sa panginahanglan sa katawhan nga buot nato’ silbihan o pangunahan. Gani molabaw pa ni siya niadto’ng lider nga naandan na sa iyang pagkatawo, kay dugo sa kaugatan niya ang gisandigan.

Ang lider, dili seremonial o adorno  nga igo lang gipabarug nga inutil, walay gahum ang kamandoan nga mapasunod ang kinabag-an, kay mao ma’y anaa sa iyang kawsa, ang motibo nga bentaha alang sa iyang kaugalingo’ng interes. Ang  estilo sa iyang pagkalider, imong masabot o matukib  pinaagi sa iyang kalihokan.

Ang birtud o hiyas sa usa ka maayo’ng lider, nakabase sa maunongon ug matinud-anon nga kaakohan sa pangalagad alang sa gipangunaha’ng katawhan, nga wala nakapukos sa iyang kaugalingon kaayohan.

Mao’y anaa permi ang kabulahan sa kadaghanan, nga usa ka pagmalasakit nga giisip nga kalampusan, aron maangkon ang kadungganan sa ligdong ug gamhanan nga lider.

Ang epektibong lider, ehemplo sa maisogon nga higpit sa pagpatuman ug pagpasunod sa bataka’ng kamandoan, nga dili makatugot sa mga butang nga makapukan sa iyang imahe. Wala’y ilhon ni bisan kinsa nga molapas sa ikaguba sa iyang katawhan. Iyang baruganan nga unahon ang kabulahan sa kinabag-an, bisan kini kapildihan sa iyang personal nga ambisyon.

Kay ang kusog sa katawhan mao’y bililhon kaniya. Ang umaabot mao’y gilantaw ang pagpundar karon og mga maayong binhi sa lig-ong katilingban, alang sa sunod nga henerasyon. Pangandoy niya, nga bisan sa pagpa-ubos sa pagsilbi sa katilingan, katukoran siya’g pedestal sa kasaysayan nga dili gayud mausik ang pagkalider niya, nga mao’y gihimo’ng inspirasyon sa mga kaliwatan.