Traffic sa Fuente O circle

Ang CITOM nahimo na nga CCTO kon Cebu City Transportation Office. Ang uniporme sa mga traffic enforcers na-green na, ug bag-o na usab ang traffic head sa dakbayan, kinsa matud pa, usa ka traffic expert.

Apan, wa man gihapon moluag ang dagan sa trapiko sa Fuente Osmeña Circle, ug sa tanang dapit sa dakbayan. Particular kaayo ko sa Don Sergio Osmeña-Fuente Osmeña tungod kay anha man ko mag-agian paingon, ug gikan sa Guadalupe.

Immediately, pag-take over sa bag-ong traffic czar sa dakbayan, ug pag-ilis sa uniporme sa mga CCTO enforcers, giusab dayon ang paagi pag-park sa Fuente Osmeña Circle. Imbes kadtong mag-diagonal, daghan ang maka-park, dili na mag-atras-atras, ug safe kaayo ang pag-exit, karon, parallel na, magsumpot ug diyutay na lang ang maka-park.

Wala kini makapaluag sa dagan sa trapiko. Huot lang gihapon. Sa ato pa, palpak ang abilidad sa CCTO.

Sukad mabag-o ang paagi pag-park sa Fuente, wa na g’yud ko maka-park dihang dapita, lakip na sa may RCBC. Sa ato pa, kanang mga establishments naglibot sa Circle, naminosan og usa ka customer. Ug pila kaha mi ang dili ug wala na maka-park sa Fuente?

Tan-aw nako, ang nakatampo og daku sa kaguliyang sa trapiko, mao ang ka-lax sa enforcement sa mga traffic laws, ug ka-wala’y disiplina both sa mga driver ug pedestrian. Period.

* * *

Hapit na g’yud. Mo-file na sila sa ilang mga certificates of candidacy. Matud pa, makita na nato ang scatter. Karon pa ni mahitabo, nga  gumikan sa kadaghan sa mga partido sa politika, ang maong mga political parties wala’y mga kandidato. Ug duna sa’y managan nga wa’y klaro nga partido.

Mao nga ang maong mga partido, tungod kay wala sila’y kaugalingon nga kandidato, magpili lang kun kinsa ang ilang paluyohan ug suportahan.

Ang nakasamot pagka-unique sa umaabot nga eleksyon, kay mas daghan ang modagan pagka-bise presidente kay sa pagka-presidente.

Sa among panahon, tungod kay wala pa mouso ang popularity survey, ang mga isyu, ang mga baruganan, prinsipyo  ug ideyolohiya sa partido maoy among basehan pagbotar. Hinoon, Liberal ug Nacionalista ra man to kaniadto.

Importante kaayo ang machinery ug organization. Of course, kuwarta. Labi na nga karong panahona, majority of the votes are for sale.

Kun ibaligya lang gihapon nato ang atong mga katungod pagpili, ug kun maoy atong basehan ang ka-popular sa mga kandidato sa atong pagpili, wala kita’y mapaabot nga tingusbawan sa atong nasud. Ug ikaw ang sad-an niining tanan.