Pagbangon sa Ciudad

Human sa pipila ka tuig nga pagkatanggong, madayon na ba gayud kaha ang konstruksiyon sa Ciudad project diha sa luna nga gipanag-iya sa kagamhanan sa lalawigan dinhi sa dakbayan sa Sugbo? 

Sa niaging mga adlaw, miaprobar og resolusyon ang Provincial Board nga nagtugot kang Gobernador Hilario Davide III pagkab-ot og kasabotan uban sa Fifth Avenue Development Corporation, ang developer sa Ciudad project.

Ang maong lakang sa Kapitolyo sinyales na ba kaha nga masugdan na gayud ang P1.2 bilyon nga proyekto? Daghan ang naglaum nga moarangkada na kini sa katapusan, human nga mitiurok gumikan sa pagbabag sa kanhi administrasyon sa dakbayan sa Sugbo.

Hinuon gikataho nga suportado ni Mayor Michael Rama ang lakang pagbanhaw sa Ciudad project. Tungod kay mismong mga molupyo sa dakbayan ang makabenepisyo, andam kuno siyang mopursige alang sa katumanan niini.  

Kahinumdoman nga puwerte nga nakababag ang mayor kaniadto nga si Tomas Osmeña sa maong proyekto sa kagamhanan sa probinsiya. Iyang rason mao ang grabe nga trapik diha sa Banilad-Talamban area.

Gani iyang nakumbinse ang konseho sa dakbayan paghimo og lakang nga nagdili pagtukod og tag-as nga mga edipisyo sa maong lugar. Kini aron kuno nga dili mograbe ang trapik tungod sa nagkahuot nang karsada.

Apan daghan ang nakatimaho na dili trapik ang hinungdan niini. Tungod lagi kay mortal nga kaaway sa pulitika si Osmeña ug ang gobernadora kaniadto nga si Gwendolyn Garcia, wala gayud kaugpo ang maong proyekto. Imbis nga konkretong edepisyo ang itukod, nagsugwak na hinuon sa sagbot ug kahoy ang maong project site karon.

Ako mismo nanghinaut nga madayon na kining maong proyekto niining panahona. Kinahanglan nga sugdan na kini niining panahona nga maayo pa ang relasyon tali sa dakbayan ug Kapitolyo.  

Bitaw, sayang ang maong proyekto. Kun natuman pa kini kaniadto, hagbay ra unta kini nga nakatabang sa dakbayan pinaagi sa paghatag og trabaho ngadto sa gatusan ka molupyo sa Barangay Apas ug Banilad.

Gani angay nga dalion ang katukoran niini. Kay kun maabtan kini sa sunod eleksiyon ug nga modaug na usab si Osmeña pagkamayor ning dakbayan, dulom pa sa alkitran ang kahigayonan nga makabangon pa kining maong proyekto.