EDITORYAL - Mabini kinsa ka?

Subo kaayong pamalandungon nga aduna diay daghang kabataang Pilipino ang wala makahibalo nga si Apolinario Mabini usa ka bakol ug mas pa nga siya maoy giisip nga utok sa rebolusyon gikan sa panahon sa Katsila hangtud na sa Amerikano.

Bisan si Presidente Benigno Aquino III nasagmuyo sa kalidad karon sa edukasyon sa atong mga eskuylahan human niya masayri nga adunay mga nakakita sa pelikula nga nangutana kun nganong wala gyud nila makita si "Mabini" nga nagtindog.

Si Mabini biktima sa sakit nga polio niadtong 1896, panahon nga diin wala pa matawo si Dr. Jonas Salk, ang Amerkanong nakadiskubre og epektibong bakuna batok sa maong sakit.

Kung ang pagkabakol pa lang ni Mabini wa na masayri sa kabataan, labaw na sigurong wala sila masayod o ba kaha wa itudlo kanila ang gibug-aton sa natampo ni Mabini sa rebolusyon bisan sa pisikal niyang limitasyon tungod sa iyang pagkabakol.

Ang pagkalantip sa panghunahuna ug pagkalig-on sa iyang mga baruganan ug maayong magtatambag mas makamatay pa itandi sa mga riple sa mga Katipunero niadtong panahona, leksyon nga napapas na sa panghunahuna karon sa kabataan.

Sa maong salida, gipakita ang duha ka matang sa mga edukadong lider sa Katipunan nga naa ang nasud kaniadto.

Lider nga nigamit sa utok lamang (Mabini) ug lider nga adunay kaubang kaisog (Heneral Luna) apan pareho og tumong, ang maangkon ang kagawasan sa mga Pilipino.

Angay sigurong tutokan sa atong Departamento sa Edukasyon kining pagtudlo pagbalik ang kasaysayan sa Pilipinas sa atong mga estudyante.

Kinahanglang dili kalimtan nga kining atong mga bayani maoy hinungdan sa kagawasan ug demokrasyang natagamtaman nato karon.