Ang ulo nga ka-upawon (2)

Ayaw pakawala sa paglaum, kun ugaling wala mosaler ang ulahing remedyo nga gituki nato sa miaging lindog, mahitungod sa buhok nga ka-upawon na. Angay nato'ng masabtan, nga bisan gihimo na nato ang mga natural nga remedyo sa pagpatubo o pagpahimsog sa atong buhok, dili gayud kini moepekto.

Kanus-a man kun padayon usab ang pag-alkontra niini pinaagi sa pag-inom og isog nga antibiotics, isog nga tambal sa kasingkasing, chemotherapy ug grabe'ng eksposyur sa kainit sa adlaw ug permi bantang sa 'radiations'. Hasta ang dapit sa palibot sa 'power depot' sa kuryente ug bisan sa 'communication towers' diin ka nagpuyo, way kaseguroan ang mga remedyo nga himuon nato.

* Dugos o 'honey' nga sagola'g 'olive oil' —  Isagol pag-ayo ang 2 ka kutsarita sa dugos ngadto sa 2 ka kutsara sa 'olive oil', unya dugangi og 1 ka kutsarita sa 'cinnamon powder'. Human masagol, butangi ang apektadong bagulbagol nga masahean makadiyot, unya pasagdan sud sa 15 mins. Ighuman pwede na mag-'mild shampoo' dayon banlawan o hugasan sa inadlaw nga tubig. Buhata kini kanunay 2 ka beses sa semana, nga sud sa 3 ngadto 4ka bulan, makita na ang resulta. Apan ipadayon kini hangtud molabo o mohimsog na ang mga buhok mo. Matngoni lang nga di maalkontra, sa ato na'ng pagpasabot.

* Sibuyas bombay pula o puti —  Maayo sab ni, ilabi na niadtong opaw na ang dapit sa agtang, sa bunbonan, sa alimpulos o sa tampihak, nga mora'g isigka- kilid na lang ang adunay daginuto'ng buhok. Hiwaa ang sibuyas bombay ug inudnod sa bagulbagol ang hiniwang bahin sa sibuyas, hangtud mapula kini. Buhata kini sa buntag ug sa hapon, 3 ka beses sa semana, nga  sud sa 2 ka bulan, makita na ang resulta. Ipadayon ni samtang inanay nanuybo na ang imong paglaum nga katuboan pagbalik sa buhok ang naupaw nga bagulbagol.