Gipangtaktak sa trabaho

Dear Atty. Divine,

Duna kami reklamo batok sa among previous employer nga usa ka department store nga ilegal nga mitaktak namo sa trabaho. Miduol na mi sa among abogado ug ang iyang gisulti namo nga unya ra siya mopasaka og kaso sa NLRC kun maaprobahan na ang dugang nga P13 nga suhulan matag adlaw.

Amo siya nga gi-text kun mahimo na ba mi karon nga mo-file og kaso apan miingon siya nga pahuwaton ra kuno mi niya sa iyang text. Dugay na mi nga nagpaabot apan wala man gihapon. Unsa may maayo namo nga buhaton? Unta imo mi nga matambagan sa angay namo nga buhaton. — Joy

Dear Joy,

Kamo mismo nga mga empleyado nga gitaktak mahimo man kamo nga modangop sa NLRC bisan og wa’y abogado. Ang NLRC adunay complaint form nga  mahimo ninyo nga i-fill-up ug dayon inyong i-submit kanila pagbalik. Magpili ra ka sa ilang complaint form kun unsa ang imong reklamo batok sa previous ninyo nga employer, kun illegal dismissal, imo ra nga i-check ang illegal dismissal. Ang NLRC mopatawag ra na ninyo og hearing uban sa employer alang sa posible nga pag-areglo. Kun dili kamo maareglo, then ipadayon ang kaso ug pasumitohon kamo og position paper ug mao na kana ang higayon nga magkinahanglan mo og abogado aron maoy mohimo sa inyong Position paper nga diin inyong ibatbat ang inyong mga argumento ug ang inyong mga ebidensya. Thanks and God Bless. – Atty. Divine

Alang sa inyong pangutana ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column mata’g Miyerkules ug Domingo.