EDITORYAL – Estrikto nga pagpatuman

Grabe na kaayo ang problema sa trapiko pagka karon. Ang hinungdan niini mao ang nagkadaghan nga mga sakyanan unya wala mapalapdi ang mga karsada ug wala’y bag-ong kadalanan nga gihimo.

Dinhi lang sa Central Visayas, kada tuig adunay madugang nga kapin sa 20,000 ka sakyanan, sagol-sagol lang sama sa mga brand new ug mga surplus.

Mga karaang taxi gitugotan lang gihapon sa Land Transportation Franchising and Regulatory Board (LTFRB) sa pagdagan bisan og lapas na kini sa napulo ka tuig.

Bisan og grabe na kaproblema ang trapiko, dili lang dinhi sa dakbayan sa Sugbo, apan gipasagdan ra sa mga tinugyanan sa kagamhanan ang mga sakyanan nga anaa lang gipangparada sa daplin sa karsada.

Ang rason niini kay ang mga tag-iya wala may grahe nga kabutangan sa ilang mga sakyanan. Kini’ng mao nga problema mahimo nga kahatagan na og sulbad.

Si Valenzuela City Congressman Sherwin Gatchalian misugyot og House Bill 5098 nga kun mahimo’ng balaod dili na makapalit og sakyanan kadtong mga wala’y grahe.

Gihangop sa kadagkoan sa Land Transportation Office kining mao nga balaudnon ni Gatchalian, apan giangkon ni LTO-7 Regional Director Arnel Tancinco nga magdepende na usab kini sa estrikto nga pagpatuman sa balaod.

Daghang tag-iya og mga taxi nga aduna’y grahe, apan dili masulod ang gatusan nila ka units. Kini maoy rason nga daghang taxi, ug mga passenger jeepney, ang anaa ra daplin sa karsada gipang-parking.

Ang balaudnon ni Congressman Gatchalian nindot kaayo og tumong apan ang problema mao ang mga tawo nga gitugyanan sa pagpatuman sa mga balaod.