Ang karsada ni Luigi

Maayo nga klarohon ni Kongresista Luigi Quisumbing asa niya paagia ang iyang plano nga coastal diversion road gikan sa SRP paingon sa Liloan. Kay kun dili g’yud siya makaesplikar unsaon niya paglagbas ang huot na nga karsada sa Cebu City lahos na ngadto sa Mandaue Reclamation Area (NRA) ngadto na sa coastal area sa Consolacion, nagtuo ko nga “epal” ra g’yud ning giapas ni Luigi kay hapit na ang filing sa sertipiko de kandidatura alang sa eleksyon sa 2016.

Kaniadto pa ko nakadungog niining Luigi nga gusto niyang patukoran og bridge gikan sa SRP paingon sa Mactan aron makuhakuhaan ang trapiko sa Mandaue.

Pero nawagtang lang kadtong iyang suhestiyon. Karon nga nakadungog na pud kita og laing suhestiyon pagsulbad sa trapiko sa siyudad sa Sugbo ug Mandaue gikan sa baba ni Luigi, magpaabot na lang kita nga mahanaw ra pud kining maong sugyot.

Basta maggikan sa dili kaantigo, wala g’yuy kapaingnan ang suhestiyon kay ang uban igo ra g’yud sa pagsaka sa ilang kilay.

Apan ngano nga si Luigi man ang mangahas pagsulbad niini nga kining trapiko sa Mandaue problema man kini nga gitanom sa iyang partner nga si Mayor Jonas Cortes sulod sa siyam ka tuig?

* * *

Ang pagkanaog sa rating ni Bise Presidente Jejomar Binay nakaapekto pag-ayo sa iyang pagpangandam pagdagan pagka-presidente sa 2016.

Ang iyang TV advertisements, maklaro nga apektado kaayo si Binay sa mga isyu nga pagpangakawkaw nga gibato ngadto kaniya ug sa iyang pamilya. Ingon sa nagpakiluoy ra si Binay sa katawhan. Kay matud pa niya nga bisan kuno sa baga nga dokumento nga iyang gisumiter aron lalison ang mga pamasangil nga pagpangawkaw ug pagpatubo sa bahandi sa pamilyang Binay, wala siya paminawa.

Baya pud ni si Binay, mura og dili abogado. Nasayod man kini siya nga kun dokumento lang, dili kini mobarog kun wala’y mo-verify niini.

Unsaon man? Makapila siya ipatawag sa Senado aron mopasabot, apan wala siya moatubang aron mo-esplikar ug motestigo sa iyang mga dokumento. Makadaghan na si Binay gihatagan og higayon sa Senado nga makadepensa sa iyang kaugalingon, apan wala niya kini buhata.

Unya ilaron pa niya ang mga Filipino nga wala kuno siya paminawa? Mangutana ko,  diin man si Binay og minilyon nga gibayad nianang iyang TV ads?

Sama kang Binay, naghinayhinay na og paminaw ang mga tawo sa isyu sa citizenship batok kang Senador Grace Poe.

Nagkakusog ang panawagan sa social media ngadto kaniya pagpasabot ngano nga makausa sa iyang kinabuhi (niadtong 2006) gibiyaan niya ang Pilipinas ug nanumpa didto sa Amerika.

Usa pa, dili maayo nga ang Pilipinas adunay “Kana” nga presidente o presidente nga Pinay nga may Amerikano nga first family.