Nag-unang 10 ka pang-alibyo (2)

Ania ang sumpay sa ulahing nahisgutan nato sa miaging lindog.

4.  Coriander — Sa ato na'ng natuki, usa ni ka herbal nga gihimo'ng pagkaon sa uban dapit. Liboan na ang katuigan nga gigamit sab nila kini nga ayuda sa pagpatunaw sa mga kinaon. Ang pag-inom ini nga tsa salaon, makapa-alibyo sa kalibang o kaha napasmo. Epektibo sab ni sa 'stress' o kakulba o nerbiyos. Matud pa usab, ang dahon ini, mas aduna'y dagha'ng 'antioxidants'.

5. Garlic — Ahos kini'ng panglamas sa pagkaon, nga adunay natural nga 'sulphor plant's compound'. Ang kanunay nga iuban kini sa mga tingkaon nato, makapa-us-os kini'g 76%, sa risgo nga masakit o atakehon sa kasingkasing. Mopanormal ni'g 5-10% sa kolesterol lebel. Mopalayaw sab sa dugo ug mopaus-os sa hayblad. Makasanta kini sa kanser nga ipagawas ang mga toksins o mga 'carcinogen', sa colon, nga nakadaut sa mga selyula sa DNA. Makapaalibyo sab ni sa sip-on o sa synose (sinus), nga permi nagping-ot sa kalabad sa ulo.

6.  Ginger — Luy-a kini'ng klase sa lamas, nga naa permi sa kusina. Nga gihimo'ng medisina sa mga Asiano ug Indiano, isip pag-alibyo sa pagpatunaw o paghilis sa kinaon. Sama sa dulaw o luy-a'ng pulahon nga orange (turmeric), makapaalibyo sab sa atraytis o panakit sa kaugatan o lutahan. Makasanta sab ni sa kanser. Makaayo sab sa gipanuhot sa tiyan o sa panakit sa tutonlan. Labi na sa kabuhi nga kadigwaon og pangaslom ug ingon man sa sakit sa ulo o migraine.

7. Mustard — Mga liso ini nga kaliwat sa repolyo (cabbage) nga utanon, nga pulos mga 'anti-cancer'. Mopahupay sa panakit sa dughan. Susama kini sa 'cayenne peppers', nga mopanormal sa sirkulasyon sa dugo. Maayo sab ni nga panghunad sa pangatol o pangagod sa tiil. Gikinahanglan nga matag adlaw, igo na ang 1ka kutsarita sa 'mustard seeds powder', kay pasubraan makapurga ni.