Mas laktod nga silot
Namunga na ang seminar pagpangita og mas epektibong mga paagi sa pagpanalipod ug pagpalambo sa mga katungod sa senior citizens. Ang seminar nga kabahin sa Kapamilya Seminar Festival sa tanang weekends sa Septiyembre nisangpot sa pag-uyon sa Integrated Bar of the Philippines (IBP) Cebu Chapter pagtabang sa pag-andam ug pagpasaka sa mga kaso alang sa senior citizens nga giabusohan sa mga botika, kan-anan, sakyanang pamasahero ug ubang patigayon.
Si IBP Cebu President Gonzalo “Sally” Malig-on niingon nga andam silang modestino og mga abogado ug paralegals sa pag-atiman sa mga reklamo sa senior citizens nga di hatagan sa 32% nga diskuwento nga gimando sa balaod. Nanghinaot si Malig-on nga kun may masampolan na sila og kiha mosunod nang ubang mga negosyo sa balaod.
* * *
Sa iyang bahin, si Cebu City Councilor Alvin Dizon nag-andam na sa ordinansahon nga mohimong mas sayon sa pagsilot sa mga bay patigayon nga di motahud sa Expanded Senior Citizens Act of 2003 (Republic Act No. 9257): I-apil na ang silot nga mas laktod nga mapahamtang, ang pagkanselar sa business permits sa malapasong mga negosyante.
Si Dizon nga nakatambong sa seminar sa senior citizens nidason sa sugyot sa iyang kaubang panelist nga si kanhi Cebu City Legal Officer Ralph Sevilla nga himuon nga dugang kundisyon sa business permit ang pagtuman sa tanang benepisyo sa senior citizens. Matud ni Dizon mangunsulta siya sa city treasurer, Office of Senior Citizens Affairs (OSCA) ug ubang sektor sa di pa ipasaka ang ordinansahon sunod buwan.
* * *
Giaprobahan na sa City Council sa niaging semana ang resolusyon ni Dizon nga naghangyo sa Commission on Elections (COMELEC) paghatag og priority lanes sa ilang mga buhatan ug ubang registration centers alang sa senior citizens ug persons with disabilities (PWDs). Nipasalig si COMELEC Cebu City North District Election Officer Marchel Sarno sa pag-atiman dayon sa awhag. Hinaot nga mapatuman na sa nahibiling mga adlaw sa rehistrasyon hangtod sa Oktubre 31.
* * *
May espesyal gyong luna ang senior citizens ug PWDs sa kasingkasing ni Dizon. Hingpit nang napatuman ang ordinansa nga iyang gipangamahanan uban ni Konsehal Lea Ouano-Japzon nga naglibre sa unang tulo ka oras sa parking sa ilang mga sakyanan sa tanang publiko ug pribadong parking areas sa dakbayan, pasahero man o sila drayber, taga dakbayan man o taga laing dapit o bisan taga laing nasud. Bugtong ipakita mao ang IDs.
Ang mga makalapas sa ordinansa mahimong multahan (gikan sa P500 ngadto sa P5,000) o prisuhon (usa ka adlaw hangtod sa usa ka buwan) o multahan ug prisuhon. Ang magpaka aron ingnong senior citizen o PWD multahan og hangtod P5,000 ug prisuhon og hangtod sa usa ka buwan, segun sa gimbut-an sa korte.
- Latest
