EDITORYAL – Climate Change

Miingon si Santo Papa Francis nga ang Climate Change dili lang problema sa mga gobiyerno kondili problema sa tanan.

Iya kining gipamulong atubangan sa mga lider sa Amerika pinangulohan ni Pres. Barrack Obama sa pagduaw niya sa maong nasud karong semanaha.

Haom kaayo nga sa Amerika kini gipadayag sa Santo Papa. Ang US maoy labing dato sa kalibotan ug mao usab ang nag-una sa pagguba sa kalikopan sa panahon nga gitawag og "industrial revolution" sugod mga tuig 1700's hangtud karong panahona.

Niadtong mga panahona way puas ang tawo sa pagnuki-duki, pag-eksperimento ug pag-imbento og mga butang nga makapasayon sa iyang trabaho.

Apan sa paghimo niini, ang kalikopan nga maoy naghatag sa tanang raw materials nga gigamit sa tawo maoy naalaot ug nagguba.  Ang Climate Change o ang pag-usab na sa klima sa kalibotan maoy resulta sa pagpasagad sa tawo. Nagdala na hinuon kini og daghang mga sakit, katalagman, ug nakaapektar sa naandang kinabuhi sa mga tawo sa kalibotan.

Ang mga katiguwangan nga buhi pa hangtud karon, kun pangutan-on makahinumdom pa nga aduna kaniadto mga sapa dinhi mismo sa sentro sa Metro Cebu nga ilahang kaligoanan ug mamasol pa sila og isda  nga pangsud-an.

Apan karon, bisan usa ka sapa dinhi sa Metro Cebu dili na mailhan kun sapa o kanal tungod sa kahugaw ug kabaga na sa lapok nga gidagaydayan og itom nga tubig padung sa dagat.  Ang nagpahinumdom na lang kanato mao ang ilang mga pangalan sama sa Guadalupe River, Mabolo Creek, Pari-an Creek,  Mahiga Creek, Butuanon River, Mantuyong Creek .

Moabot unya ang panahon nga maparehas kini sa uban nga nakalimtan na ang mga pangalan kay natabunan na man og mga kabalayan ug mga buildings. Dili mahunong ang pagkahanaw niining maong mga sapa kun dili tinud-on sa mga naa sa gobiyerno ang pagpanalipod niini.

Makatabang ang katawhan bisan sa pagsunod sa Solid Waste Management Act ug pagsunod sa mga lagda sa Office of the Building Officials.