Aduna ba’y mitimbre?

Dakong tanghaga ang naglikos sa dakong operasyon sa otoridad sa Barangay Duljo-Fatima sa dakbayan sa Sugbo nga miani og milyones nga kantidad sa illegal nga druga apan wala ni usa ka suspek ang nasikop.

Daghan ang nakatimaho nga adunay kunsabo gikan sa otoridad ang giingong notado nga drug lord sa maong barangay hinungdan nga nakaikyas kini. Ambot kun unsa kini ka tinuod. Apan angay nga susihon gayud kini sa kadagkoan sa kapolisan.

Kahinumdoman nga mokabat sa P4 milyones ang kantidad sa shabu ang nasakmit sa otoridad sa ilang pagronda sa compound nga gipanag-iya ni Jeffrey “Jaguar” Diaz didto sa Duljo-Fatima kaniadtong Domingo.

Si Jaguar maoy gitumbok nga usa sa labing dako nga drug dealer sa dakbayan. Apan atol sa maong operasyon, nakaipsot kini ug ang iyang mga batos. Ug mga binulto nga druga na lamang ang naabtan sa otoridad.

Sa sunod nga operasyon didto maong barangay Lunes sa gabii, wala gihapon maabti sa kapolisan ang ilang subject. Si Mart Diez, ang giingong sinaligan ni Jaguar, ang nakasibat usab. Hinuon subra sa P2 milyones nga kantidad sa shabu ug tulo ka gidudahang pusher ang nasignit sa kapolisan atol sa maong operasyon.  

Karon, mitumaw ang dakong pagduda nga adunay nakapindot ni Jaguar mahitungod sa maong operasyon. Bitaw, dakong tanghaga ngano nga aduna siyay advance information nga unta hilom kadto nga operasyon sa kapolisan.

Aduna kahay sakop sa kapolisan nga nagbudhi ug nga mi-warning ni Jaguar mahitungod sa operasyon aron nga makasibat kini? Posible nga nahitabo kini. Dili nato ikalimod nga adunay mga pulis nga protektor sa negosyo sa ginadiling druga.   

Hinuon mimando na ang liderato sa Police Regional Office-7 og makuting pakisusi niining maong dakong kontrobersiya. Gani alang kay PRO-7 director Chief Superintendent Prudencio Tom Bañas, mora’g useless ang maong operasyon tungod kay wala matuman ang tuyo niini, nga mao ang pagdakop kang Jaguar.

Dako nga sagpa sa imahin sa kapolisan kun tinuod kining mga pagduda nga adunay nagtimbre kang Jaguar aron pag-ikyas gikan sa operasyon sa otoridad. Hinuon dili kana ikatingala, ilabi na kun molihok na ang kwarta sa druga nga kayang mosilaw ni bisan kinsa.