Ang sekreto ni Cecilia

Swerte kaayo ang sama ni Cecilia Y. Olita, nga kinaiya na daan niya ang pagkametikuloso sa kahimsog sa panglawas. Gikan sa kabatan-on, naminyo ug nabiyuda nga karon mag 73 na. Dili ka makatuo kun mahimamat mo siya, tungod kay ang iyang panlihok o pamayhon, ang ngislit sa pahiyum, ug pakiglambigit sa katilingbanon nga kalihokan, maoy sekreto niya sa kabatan-on.

Kanunay ko ni siya nga gipanid-an, kay amo man ni'ng silingan, nga kanunay aktibo, kilas ug abtik kaayo mora'g di batio'g kakapoy. Kun hinabion ko ni siya, moyanghag nga mapahiyumon nagkurikuri sa mga gimbuhaton sa iyang opisina sa 'senior'. Bese kaayo'ng adlaw tanan isip pangulo sa mga edaran. Akoy kapoyan magsud-ong sa kalihokan niya. Lingaw sa buhat nga way kahumanan.

"Sus brod Pons, kun di ka maantigo modiskarte sa kinabuhi nga tugob sa negatibong emosyon ug sa dagha'ng problema, mapildi ang atong lawas." Pasiaw pa niya kanako, apan mao gayu'y angay nato buhaton. Bisitahe siya sa barangay Hipodromo, himamata dili ba masaypan mo'ng batan-on pa.

Mabinantayon siya sa pagkaon. Niya pa, ipahulay gyud ang lawas, mata ug kusog. Kalkulohon nga permi sab maglihok ang panghunahuna o kaisipan. Dili magtanga nga kanunay lang maghinuktok, kay usa ni sa makaluya o maka-stress nga  mosangpot sa dagha'ng di maayo'ng pamation sa panglawas. Diha'y kausa giingnan nako siya ngano usahay sa mga meeting magpiyong ka man?

"Abe mo Pons, stratehiya ko na nga sa makadiyot nga pagpiyong mao kana'y akong pagpundo og enerhiya sa mata ug sa kaisipan. Aron kini makamugna og maayo'ng ideya nga ikatampo sa kalamboan alang sa katilingbano'ng kalihokan. Ang kawsa niya paghilig sa mga senior sa pagsayaw, usa ni sa lakang  nga kapugngan pa og dugay ang kabatan-on sa senior nga magpabili'ng himsog.