EDITORYAL - Ang Martial Law

Ugmang adlawa handumon sa mga Filipino ang anibersaryo sa ika-43 nga kasumaran sa Martial Law human sa Proclamation 1081 ni Presidente Ferdinand Edralin Marcos nga maoy giisip nga labing ngitngit nga bahin sa kasaysayan sa Pilipinas human sa Ikaduhang Kalibotanong Gubat.

Sukwahi sa Martial Law nga gideklarar ni kanhi presidente Jose P. Laurel niadtong Septiyembre 21, 1944 nga ang tumong mao ang proteksyon sa mga ordinaryong sibilyan gikan sa mga kamot sa Hapones, ang Martial Law ni Marcos, gidesenyo aron gukdon ang iyang mga kaaway sa politika aron masigurong magpabilin kini sa gahom.

Una nga napiang sa gibuhat ni Marcos mao ang media kay niadtong mga tuiga kritikal kini sa mga polisiya sa gobiyerno. Gipangsirad-an ang mga sibyaanan, telebisyon ug publikasyon sa mga pamantalaan.

Daghang mga sakop sa media ang gidakop, gipatay, kun dunay mga balita nga mogawas gisala na og maayo nga di makadaot sa gobiyerno. Sa laktod, gibabagan ang kagawasan sa pagpadayag.

Tuig 1983 dihang nakabaton na og kaisog ang katawhan dihang gipatay ang tigbalita ug kanhi senador Benigno Aquino Jr. nga numero unong kritiko sa gobiyerno sa pag-abot niya sa Manila International Airport niadtong Agosto 21 sa maong tuig. Hingpit nga nagun-ob ang rehimeng Marcos niadtong Pebrero 1986 sa usa ka People Power Revolution ug nabalik ang demokrasya sa Pilipinas.

Sa mga nakasinati sa kabangis sa Martial Law kaniadto, wa nay ganahan kanila nga mabalik pa ang maong panahon.  Ang henerasyon karon nga wala makaagi niini  mao ang yawe aron di na kini mabalik pa. Mahimo kini pinaagi sa pag-edukar kanila unsaon pagmahal ang demokrasyang ilang natagamtaman niini panahona.

Angay silang magmabinantayon ug magpakabana sa mga panghitabo sa ilang gobiyerno ug dili lang sa way hinungdang butang nga gikabuangan sa ubang kabataan karon.