BFP-7 director ug gobernador nagtagbo

Ang bag-ong regional director sa Bureau of Fire Protection (BFP)-7 nga si Senior Superintendent Esmael C. Codilla nakigtagbo ni Gobernador Hilario Davide III kaniadtong Septiyembre 15.

Atol sa ilang panaghinabi, daghan sila og gihisgotan nga mga isyu, lakip niini ang pagbalik pagbutang og fire sub-station sulod sa Capitol Compound.

Ang laing isyu nga gihisgotan mao ang kabahin sa 13 ka lungsod sa Sugbo nga hangtud karon nagpabilin nga wala pa’y fire stations.

Mipasalig si Gov. Davide nga iyang pakigsultian ang mga mayor sa mao nga mga lungsod aron mohimo kini og lakang sa pagdonar og yuta nga dili momenos 300 metros kuwadrados aron matukoran og fire station.

Ang mga lungsod nga wala pa’y fire station mao ang Alcantara, Ronda, Badian, Alegria, Santander, Alcoy, Asturias, Pilar, Tabogon, Borbon, Sta Fe, Madridejos ug Samboan. Ang Samboan pa ang nakadonar og lote pabor sa BFP.

Nagkasabot si Sr. Supt. Codilla ug Gov Davide nga palig-unon pa ang puwersa sa atong kabomberohan. Gani nahisgotan ang pag-instalar og centralize nga communication system alang sa tanang fire stations lukop probinsya sa Sugbo.

Kini aron nga sa panahon nga dunay dako’ng alarma sa sunog dali ra ang koordinasyon.

Gihisgotan usab nga ang mga fire trucks sa kagamhanan sa probinsya sa Sugbo nga gipang-apod-apod sa kalungsoran idonar kini sa BFP aron mao na kini ang moatiman ug madestinohan og personnel ang mga lungsod nga wala pa nakatukod og fire station.

Sa kataposan, gitug-anan ni Sr. Supt.  Codilla ang gobernador kabahin sa kahimtang sa BFP-7 building diin 3/4 sa space niini gigamit na sa Cebu City Medical Center (CCMC).

Mihangyo karon ang BFP-7 og luna nga dili momenos 1,000 square meters aron matukoran og bag-ong regional office ug provincial office sa kabomberohan.