Ang yawan-ong gambalay sa pagpahimulos

Ako nakuratan sa dihang akong nadawat ang text gikan ni Mam Jenen Dellera nga usa sa among mga estudyante sa University of San Carlos ang gilugos patay sud mismo sa iyang kaugalingong pinuy-anan. Anugon 17 anyos pa intawon ang maong bata. Dako pa unta og mahimo, dako pa unta og makab-ot. Seguro ko nga ang maong tawo gigamhan sa yawa (sama sa drugas ug labaw na kauwag). Ning mga panahona, husto gyud ang giingon sa unang sulat ni San Pedro nga ang yawa naglibot-libot sama sa liyon nga nagngulob aron mangita og tukbonon. Angay siyang suklan ug labaw na nga angay siyang pakgangon sa sunod niyang biktimahon. Mao nga karong mga panahona dili maayo nga mokumpiyansa ug di maayong magsalig nga kanunay’ng luwas ang tanan. Ang tanan dili na kasaligan kay mahimong ang imong gisaligan mamahimong mounay nimo og tukob ug mopasakit. Ako nasubo ingon ang tibuok San Carlos kinahanglan ang maong mamumuno pangitaon ug kinahanglang iyang bayran ug unta basolan ang sala nga iyang nahimo!