Ang pagtangtang sa balhibo (1)

Gihimo'ng problema sa uban kini'ng mga balhibo nga nanuybo sa ilang kalawasan. Sama sa ilok, gusto ipahamis sa pagsundog sa uso. Tingali may katarungan sab ipatangtang kadto'ng mga balhibo sa nawong, kaylagi mora siya'g  aliwas tan-awon, ilabi na sa iyang bukton ug batiis. Hinuon imo man kana'ng kagustohan, dili na kana problema ang pagpakuha sa balhibo nga ingon sa nakapamenus sa kompiyansa o pagsalig sa imong kaugalingon.

Anaa na'y dagha'ng 'beauty parlor' nga nagserbisyo sa pagpakuha sa bisan unsa, apan kun gusto ka'ng maningkamot ini sa inyo'ng balay, sulaye kuno ni;

* Hilaw'ng kapayas ug 'turmeric powder' — Paniti ang kapayas, galinga nga molaput o mapasta, unya ang 1ka kutsarita ini, sagolan og ½ sa kutsarita sa turmeric. Imasahe sa balhiboon nga nawong ug pasagdi sud sa 15 mins, dayon hilam-osi'g init-init nga tubig. Buhata ni 2 ka beses sa semana.

* Turmeric powder ug gatas — Kun diyutay ra'g balhibo, apan kun baga'g balhibo pun-i'g harina sa bugas o pino'ng 'oats'. Ihumol ang turmeric sa gatas nga di kaayo espiso, kana'ng igo lang mopilit. Ibutang ni's nawo'ng ug pasagdi sud sa 15-20 mins., dayon hilam-osi'g init-init nga tubig.

* Asukar/ lemon / honey — Paghimo'g 'natural waxing paste'. Sagola ni sa tag 1 ka kutsarita isagol sab hasta ang ½ ka kutsarita'ng 'corn or plain flour', nga butanga'g gamay tubig para molasaw. Inita ni sud sa 3mins. Unya pabugnawa nga medyo init-init pa, dayon ipahid ibangan sa panapton o sa 'waxing strip' sa parte nga may mga  balhibo. Pataudtauri nga mauga, dayon paksita o tangtanga.  Obserbahe lang kun nahamis na'ng panit mo.

Aduna pa'y lai'ng  mga paagi o pormula ini, kun unsaon pagtangtang ang balhiboo'ng lawas nga nakahasol nimo. Ato ipadayon sa sunod nga lindog.