Mga libudsuroy

Dalaygon ang gihimo sa mga opisyal nga gipangulohan ni Acting Cebu City Mayor Edgar Labella nga gipang-rescue nila ang 40 ka batan-on nga libudsuroy ug nagpuyo ilawom sa taytayan sa Mabolo ug diha sa Banilad.

Ang 26 sa “na-rescue” mga batan-ong lalaki nga ang uban nalambigit na sa pagpanulis, samtang ang 14, mga babaye, apil na ang usa ka nuybe-anyos. Luoy kaayo kay ang maong bata, hitsuraan ra ba ug kun magpabilin siya nga libudsuroy, wala g’yud siya’y maayo nga kaugmaon.

Giangkon sa ubang na-rescue nga ang ilang mga kauban nalambigit og pagpanulis. Adunay mga ATM cards, driver’s license ug ubang dukomento nga iya ni Kevin Gil Zamoras nga na-recover gikan sa usa ka bag nga didto gibiyaan sa mga nanagan nga batan-on.

Si Kevin Gil nakontak ni CESET chief Grace Luardo pinaagi sa Facebook. Nagkahinabi mi ni Kevin Gil ug gitug-anan nga didto diay siya nagkaon sa usa ka fastfood restaurant sa Mandaue ug gikawat ang iyang bag nga may sulod nga P30 mil.

Wala na g’yud mauli ang kuwarta, ang iya na lang mga ATM cards, driver’s license ug ubang cards ang nabalik kaniya.

Unya, daghan kaayo nga mga hait nga hinagiban ang nakuha sa mga sakop sa CESET, tanod, kapolisan ug DSWS gikan sa giestahan sa mga batan-on ilawom sa tulay duol sa usa ka mall sa Banilad.

Kuyaw na g’yud kaayo kining mao nga mga batan-on kay dili na basta-basta ang ilang hinagiban, kutsilyo, pitsikurno nga may kutsilyo, duna pay improvise nga pusil para sa 38 kalibre.

Adunay na-rescue sa ilawom sa tulay sa Mabolo apan arang-arang na lang kay mga rugby ra ang nakuha sa team. Gikanaog nako kagahapon ug may mga batan-on pa nga didto. Puwerte’ng nakadagan kay nagtuo nga polis ko.

Angay unta nga ang mga tanod sa mga barangay nga adunay mga tulay ilang panan-awon ang ilawom sa taytayan nga gipuy-an na diay niini nga mga badlongon sa katilingban. Baya ‘sab mo uy, maayo man lang mo modawat og honoraryom sa City Hall.

Tungod sa balaod nga gisugyot ni Senador Kiko Pangilinan (Republic Act 9344), lisud kaayo ang paghimo’g lakang sa mga batan-on nga nakahimo og salaod.

Bisan og patyon pa kita niining mao nga mga batan-on dili gayud sila mapriso, gawas lang kun maprobar nga kun 15-anyos na sila, aduna sila’y maayong panghuna-huna atol sa paghimo nila sa krimen.

Karon kay dili man kana sila prisohon, sigurado ko nga kun ibalik kana sila sa ilang ginikanan, mobalik ra gihapon sila sa ilang gigikanan.