Gusto mo og babaye nga presidente?

Nakasuway na og babaye nga presidente ang Pilipinas. People’s Power pa ang nakapalingkod niya sa Malakanyang.

Gipangimbargo kadtong mga nakawkaw nga binilyon ka pesos ni kanhi presidente Ferdinand E. Marcos ug gipangsakmit ang mga ill-gotten wealth.

Mao nga natukod kadtong Presidential Commission on Good Government (PCGG) nga maoy gitahasan sa pagbawi sa salapi sa katawhan nga gikawat sa pamunoan ni Marcos.

May binilyon  ka pesos nga nakuha’g balik. Apan subo kaayong palandungon nga sama sa yelo, hinayhinay lang kini nga nahilis ug wala masayri hain paingon ang maong dakong kantidad nga unta angay ibalik sa katawhan.

Si kanhi Presidente Cory Aquino ang nahimong pangulo sa Pilipinas, apan ang tinuod nga nagdala sa iyang pamunoan, ang mga kanhi crony lang gihapon ni Marcos nga suheto na kaayo unsaon pag-corrupt ang nasud sa sekreto nga paagi.

Miingon sila nga panahon ni Cory adunay dako’ng kausaban? Nga ang corruption niminus? Miminus ba uroy nga midaghan ug midako man hinuon! Land grabbing? Ang asyenda nila sa Tarclac, makatug-an kun kamao ba siya niini, o dili?

Anugon lang ang bulak, kandila ug pangadye nga maoy gihimo nga hinagiban sa katawhan aron mapalagpot ang diktador nga si Marcos ug ipuli ang gituohang buotang inahan sa katawhan. Apan nasulbad ba niya ang kawad-on sa katawhan, o sila lang elite group ang misamot kaadunahan? Alang kanako, si Cory wa g’yuy nahatag nga kalipay ngadto sa mga kabus. Nakaipsot man tuod sa mga gaway ni Marcos nga migapos sa atong kagawasan apan unsa ba’y nabuhat ni Cory diha nga kita nahimo na nga gawasnon?

Nasulbad ba niya ang kawat ug krimen sa atong nasud? Subo, kaayo nga palandungon, nga hangtud karon wala g’yud mahibaw-i kinsa ang nagpatay ni Ninoy, ang bana ni Cory ug amahan ni PNoy?

Napresidente na lang ang inahan ug anak, pero nagpabiling blangko ang katawhan sa kamatayon ni Ninoy.

Unya, gihugonhugonan na usab nga may babaye nga ituboy pagka-presidente sa Pilipinas sunod tuig, 2016? Oh, no! Dili na kita magpatintal pa.