Kinsay angay ipares ni Mar?

Giawhag na ni Senate President Franklin Drilon ang iyang kaubanan sa Liberal Party nga lung-an na sa pagpangulitawo si Senador Grace Poe nga mahimong runningmate ni DILG Secretary Mar Roxas.

Matud ni Senador Drilon nga klaro na sa mga kalihukan ug sinultihan ni Poe nga dili pagka-bise-presidente, kon dili pagka-presidente g’yud ang iyang daganan sa election sunod tuig.

May mga kasaligan usab nga tinubdan dinhi sa Sugbo nga suod ni Poe nga nitug-an nga pagka-presidente g’yud ang iyang daganan. Kun nakamatikod mo, nagkadaghan na usab ang mga campaign advertisements ni Poe nga nanggawas sa telebisyon.

Sa maong mga campaign ads, dili pang bise-presidente ang punteriya niini, kon dili pang-presidente. Sa iyang mga campaign jingle sama sa "May Bagong Umaga" ug sa tuno sa "Awitin Mo Isasayaw Ko" sa VST and Company, punteriya ni Poe mao ang pagka-presidente. Sa mga jingles ni  Poe anaa kanunay sa iyang likod iyang namatay nga amahan nga si Fernando Poe, Jr. nga napilde tungod sa giingong pagtikas ni kanhi presidente ug karon Kongresista Gloria Arroyo niadtong 2004 presidential elections.

Tema sa maong mga campaign jingle mao ang pagpadayon ni senador Poe sa napakgang nga pagka-presidente  sa iyang amahan nga si FPJ.   Nagsige na usab sa pagsuroy si Poe sa nagkalain-laing bahin sa nasud ug nanawat og mga imbitasyon aron modiskurso.

Pagkakaron, nanggawas ang mga pangalan nila ni Batangas Governor Vilma Santos, Camarines Sur 3rd district Congressman Leni Robredo, ang byuda ni anhing DILG secretary Jesse Robredo nga maoy bise ni Mar.

Apan sila si Robredo ug Santos pareho nga mibalibad. Dayon, migawas ang ngalan ni Justice Secretary Leila De Lima. Silang tulo pulos mga sakop sa Liberal Party. Laing nadugang mao sila si Senador Peter Allan Cayetano ug Senador Antonio Trillanes nga mga sakop sa Nationalista Party.

Sila si Cayetano ug Trillanes mipadayag na og kaandam sa pagdagan pagka bise presidente. Apan si Trillanes nipahibawo na nga si Senador Grace Poe iyang dad-on nga presidente kun opisyal na nga mopahibawo sa iyang kandidatura. Sa lima nga gikonsidirar karon, si Secretary De Lima ang kuwangan sa "exposure" sa pamolitika. Dili usab pagkabise-presidente ang gitinguha ni De Lima kon dili sa senado.

Si senador Allan Peter  Cayetano ang makonsiderar nga tang-an. Kun maghisgot ta og integridad kun ang pagkalimpyo, pagkamatinud-anon, may lig-on nga pundasyon sa iyang moralidad ug prinsipyado, akong unahon sa ranking si kongresista Leni Robredo.

Kun maghisgot ta og kaisog ug prinsipyo ila na ni Justice Secretary De Lima ug Senador Trillanes. Sa popularidad naa si Batangas Governor Vilma Santos.

Mass-based iya na ni senador Allan Peter Cayetano. Apan nag-una nga konsiderasyon nga gipangita sa LP nga ikapares ni Roxas mao ang popularidad aron matabangan ang kalihim sa iyang ubos nga rating sa mga  survey.