Mga alas sa senior citizens
Ang P12 mil nga tinuig nga cash assistance sa Dakbayan sa Sugbo sa matag senior citizen maoy kinadak-an sa tibuok Pilipinas, apil na sa Makati City.
Mao ni ang gisulti sa usa ka senior citizen nga nihimo og tinuyo nga kuwentada sa mga benepisyo nga gihatag sa nagkalainlain nga local government units sa tibuok nasud.
Usa siya sa nihangop sa kahigayonan pagpakisayod sa mga katungod ug mga benepisyo sa senior citizens ug pagpaningil sa kalapasan sa mga balaod nga gipahinungod nila atol sa pormal nga pagsugod sa Kapamilya Seminar Festival sa tanang weekends sa tibuok Septiyembre.
Gipahigayon ang seminar gahapon sa buntag sa ABS-CBN TV Barn sa Jagobiao, Mandaue City.
* * *
Nagtinabangay paghatag og kasayuran ug pagtubag sa mga pangutana sa senior citizens sila si Leonard Castañeda, pangulo sa Philippine Health Insurance Corporation (PhilHealth) sa Mandaue City, Domingo Chavez, pangulo sa Office for the Senior Citizens Affairs (OSCA) sa dakbayan sa Sugbo, Cebu City Councilor Alvin Dizon, ug kanhi Cebu City Legal Officer Ralph Sevilla.
Usa sa gipakpakan pag-ayo mao ang pahibawo ni Dizon nga hingpit nang napatuman ang iyang gipangamahanan nga ordinansa nga naglibre sa una nga tulo ka oras nga parking sa mga sakyanan sa senior citizens, bisan asa sila nagpuyo, sa tanang shopping malls, kan-anan, hotels ug ubang mga bay patigayon sa Dakbayan sa Sugbo.
* * *
Nakapadani sab sa senior citizens ang talagsaong mga sugyot ni Atty. Sevilla: Himuong kundisyon sa business permit ang paghatag sa mga benepisyo sa senior citizens aron nga ang bisan unsa nga kalapasan mosangpot dayon sa pagkanselar sa business permit, mahimong ipaagi lang og executive order apan mas maayo nga may ipasar g’yud nga ordinansa aron mapadayon bisan kinsa ang molingkod nga mayor;
Butangan og mga abogado ang OSCA aron nga may makatutok sa pagtabang sa senior citizens nga abusohan; ug makiglambigit ang kahugpongan sa senior citizens sa Integrated Bar of the Philippines (IBP) ug prosecutors offices aron nga maatiman dayon ang ilang mga kaso.
* * *
Nipasalig si Dizon nga iyang tun-an ang sugyot ni Sevilla aron nga kahimoan dayon og ordinansahon sa labing dali nga panahon. Sa iyang bahin, gipahibawo ni Chavez nga inay magpaabot sa senior citizens sa ilang buhatan, ang OSCA maoy moadto sa ilang mga barangay uban sa lokal ug nasudnong mga buhatan sa gobiyerno.
Nadasig si Castañeda sa programa ni Chavez. Mao nga gipahibawo dayon niya nga dad-on ‘sab nila ang mga serbisyo sa PhilHealth sa mga barangay, pinaagi sa pakiglambigit sa OSCA sa Mandaue City, Lapu-Lapu City, Cordova ug Consolacion.
Labing gihangop nga pahibawo: Automatic nga sakop sa PhilHealth ang tanang senior citizens, ug bisan wa pay PhilHealth ID, sila makapahimulos sa tanang benepisyo ginamit ang ilang senior citizens ID.
* * *
- Latest
