Papahawaon na sa giabangan

Dear Atty. Divine,

Duna ko’y pangutana may labot sa among giabangan nga balay. Kapin sa tuig na mi nga nag-abang niini ug binuwan kami nga nagbayad sa rent. Apan karong bag-o, gisultian mi sa tag-iya nga papahawaon na kay gamiton na kuno ang balay nga among giabangan. Sa pagkakaron wa pa mi makakita og kabalhinan. Ang akong pangutana kun makapugos ba sila sa pagpapahawa kanamo? Wa mi gipirmahan nga kontrata ug sa tag-iya sa balay busa wa’y period kun hangtud kanus-a mi kutob moabang. Dili ba diay mi maka-demand sa tag-iya nga magpabilin lang una mi kay wa man mi kasabutan kun hangtud kanus-a mi moabang? Unsa may maayo namo nga buhaton? — Margie

Dear Margie,

Kun wa’y fix term ang inyong pag-abang, base sa balaod ang basehan sa term mao ang paagi sa pagbayad. Kun binuwan ang imong pagbayad sa abang, then monthly basis sab ang imong pag-abang, apan kun tinuig then yearly basis ‘sab ang inyong pag-abang. Kun inadlaw then daily basis ang imong pag-abang. Sa imo nga kaso kay binuwan man ka mobayad, so mo-expire ang imong pag-abang on a monthly basis. Ang maayo nimo nga buhaton karon mao ang paghangyo sa tag-iya nga tugotan lang una mo nga makapuyo hangtud nga makakita mo og laing dapit nga kabalhinan. Dili ka makapamugos sa tag-iya, ilabi na kay gamiton na nila ang maong property ug unfair ‘sab alang kanila nga di na hinuon sila makagamit niini ug gawas pa, wa ‘sab mo’y pinirmahan nga kasabutan nga nag-fix sa term sa inyong pag-abang busa wa’y sukaranan ang imong pagpamugos nga magpabilin sa inyong giabangan. - Atty. Divine

Alang sa inyong pangutana may kalabutan sa problema’ng legal, ipadangat lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules ug Domingo.