EDITORYAL – Problema sa trapiko

Wa nagkaluag ang trapiko sa Pilipinas ug wala’y senyales nga masolusyonan kini sa labing dali nga panahon bisan sa mosunod pa nga napulo ka tuig gikan karon. Kini tungod kay matag adlaw, adunay dugang mga giparehistro nga sakyanan nga mokaon og lugar sa atong kadalanan, apan gamay lang kaayo ang mga gikanselar nga mga rehistro sa karaang mga sakyanan.

Nakadugang pa niini ang kahinay sa paghimo og dugang mga lapad nga karsada mao nga maghuot kanunay ang mga sakyanan.

Sa balita sa The Philippine Star kagahapong adlawa, ang Pilipinas maoy ikalima nga adunay “worst traffic condition” sa tibuok nga kalibotan ug ikatulo kini sa tibuok Asya base sa pagtuon sa Numbeo Traffic Index for Country 2015 Mid-Year report.

Ang Egypt maoy numero uno sa listahan, sunod ang South Africa (215,34), Thailand, ang Philippines, Turkey, Russia, India, Brazil  ug Argentina.

Ang programa sa gobiyerno nga “Roadmap for Transport Infrastructure Development for Metro Manila and its Surrounding Areas” sa tuig 2030 pa maimplimentar.

Nagpasabot kini nga karon pa lang daan, angay na nga pangutan-on sa mga botante ang nagkadaiya nga mga kandidato nga nangambisyon og posisyon sa gobiyerno kun unsa ang ilang ikatabang sa problema sa trapiko sa ilang lokalidad.

Dinhi sa Sugbo adunay daghang road projects nga gihimo ang national government apan kuwang pa kini aron makatabang nga mahamugaway ang dagan sa trapiko.

Wa’y laing sulbad sa problema sa trapiko dinhi sa Sugbo kondili mao lamang ang pag-decongest sa mga urban areas niini aron mahimoan og mga dugang dagko nga dalan.

Apan kinahanglang adunay “political will” ang mga local leaders ug paghatag og relokasyon aron walay mahitabong kagubot.