Pa-thrilling ni Poe

Giingon nga karong Septiyembre 15 o 16 ibutyag na ni Senador Grace Poe ang dugay na nga gihuwat sa katawhan, ang iyang desisyon kun modagan ba siya pagka-presidente, pagka-bise presidente ba, o mag-senador lang gihapon.

Ngilngiga ni Poe no? Imagine, iyang gi-hostage ang tibuok nasud, nagpaigot, nagpalugit, nagpa-thriling-thriling, as if ang kaugmaon sa tibuok nasud nag-agad sa iyang desisyon. Mao kini karon ang political reality ug talagsaong phenomenon nga nahitabo sa atong nasud, diin ang atong paglaum gisandig ngadto sa usa ka babaye.

Naghuwat ang tanan. Unta maluoy kanato ang senador, dili kita niya palab-anan sa pagpaantos pinaagi sa pagpahuwat sa iyang desisyon.

* * *

Ipadayon karon nga tuig-tingtungha ang gilusad sa 2010 nga “Gulayan sa Paaralan” sa mga publikong tunghaan sa tibuok nasud.

Katuyoan niini mao nga ma-address ang malnutrition sa kabataan ug pag-ikag sa mga estudyante pagpananom og mga lagutmon. Nindot ni nga tulomanon. Apan, medyo late na. Dugay na unta kini nga gihimo sa Department of Education (DepEd).

Kahinumdom ko nga sa among panahon, sa mga tuig 1950s,  nag-vegetable gardening man mi sa St. Alphonsus Catholic School (SACS) sa Opon (Lapu-Lapu City). Duna ‘sab mi rope-making ug carpentry.

Sa ato pa, kining ilang Gulayan sa Paaralan, dili kini bag-o alang kanamo. Nahibu’ng lang ko ngano nga wala kadto mapadayon sa among tunghaan, usa ka private institution. Sa ako na nga giingon, medyo late na ning maong programa sa DepEd kun ang katuyoan “to address malnutrition and to promote vegetable production and consumption sa among school children.”

Ang atong kabataan karon, maayo na nga pagka-westernized. Daghan na kanila, ang wala na makaila og utan.

Mao nay ilang naandan ang mga burger, hotdog, spaghetti, fried chicken, fries, ug unsa pa na nga gibaligya sa mga fastfood outlets.

Karon, ila sila nga patamnon ug pakan-on og utan? Mosugot kaha sila niini? Kun ipugos kini sa DepEd, lagmit ang kabataan mogula sa kadalanan pag-protesta niini nga programa sa edukasyon.

* **

Karon sa America, gilantugian sa kadagkoan sa kasundalohan kun tugotan ba ang kababayen-an “to serve in the infantry, armor and other traditionally male-only fields” sa ilang kasundalohan.

Sa laktud, magpadayon ba nga “off limits” ngadto sa kababayen-an ang pagpakiggubat?

Dinhi sa ato, unsa man, ato ba nga ipadala ngadto sa mga battle fields ang atong kababayen-an, sama sa atong makita sa mga action movies, diin ang mga babaye nga sundalo mas tigas pa, mas isog pa kay sa labing tigas ug laing isog nga kalalaken-ang sundalo?