Gitan-ogan sa Ombudsman

Nagsugod na kuno ang opisina sa Ombudsman Visayas sa imbestigasyon niini sa pagkahanaw sa niaging tuig sa mga scrap metal sa Cebu City Medical Center nga gidemolis human sa makusog nga linog kaniadtong 2013.

Ang maong mga scrap metal giingong ilegal nga gibaligya ug adunay mga alegasyon nga adunay usa ka opisyal sa City Hall ang naka-benepisyo niini. Kun unsa kini ka tinuod ug kun si kinsa ang nagpaluyo niini, ato unya nga mahibaw-an sa pakisusi sa Ombudsman.

Hinuon hagbay ra nga mitunga kining maong kontrobersiya. Midako kini sa dihang napalyar ang unang bidding alang sa katukoran sa bag-o nga city hospital tungod kuno sa kwestiyonable nga winning bidder.    

Apan dakong tanghaga ngano nga karon ra miaksiyon ang Ombudsman nga unta dugay ra kining maong kontrobersiya nga gisumsoman sa media. Bisan abog wala nay nagpabilin sa nawagtang nga mga scrap metal.

Mao usab kini ang nakaparat sa buhatan sa Ombudsman. Gawas nga dugay kini moaksiyon sa mga kaso nga gisang-at sa buhatan niini, hasta ka yaya usab sa dagan sa mga pakisusi sa mga imbestigador niini. Mao nang mamatay na lamang ang ubang kihante apan nag-ungot pa gihapon ang ilang mga kaso.

Gani usa sa mga kaso nga hangtud karon wala gayud mahatagi og pagtagad sa Ombudsman mao kadtong mga criminal complaint nga gipasaka ni Dumanjug Mayor Nelson Garcia batok kang Bise Mayor Efren Gica.

Ang maong mga kaso mao kadtong malversation of public property, malversation of public funds ug uban pa nga gipasaka ni Garcia batok ni Gica kaniadtong Pebrero sa niaging tuig. Apan hangtud karon, wala gayud milihok ang maong mga kaso.

Klarong gitan-ogan kini diha sa opisina sa Ombudsman Visayas. Subra sa usa ka tuig na ug tunga human gipasaka ni Garcia ang maong mga kaso. Ug daghan na hinuon ang nagduda nga adunay dakong kamot nga nagtabon niini diha sa maong buhatan.

Hinaut nga mahigmata na kini si Deputy Ombudsman for the Visayas Paul Elmer Clemente ug dukdokon niini kadtong mga nagpabaya nga mga graft investigators. Kay kun magpadayon kining bugok nga sistema, kinsa pa man unya ang motuo niining maong buhatan?