Pagkaumol sa M & M
Sa una nilang panagtagbo isip mga konsehal sa dakbayan sa Sugbo, si Margot Osmeña nagsugod sa ikaduha niya nga termino ug si Mary Ann delos Santos sa iyang una, wala sila’y tingganay.
Bisan dug-ol ra ang ilang lingkoranan, apan pulos sila napugngan sa higpit nga panagsungi sa ilang politikanhong mga partido ug sa kalab-as pa sa baslanay sa bag-o ra nga nahuman nga kampanya.
Apan sa nisunod nga mga sesyon, kay kinahanglan man g’yud sila nga mag-abot matag Miyerkules, nagpahiyomay na sila. Apan nabantayan ni Osmeña nga labihan kaseryuso ni Delos Santos sa iyang trabaho.
Way nangahas paghimo og bisan unsa nga pagsuway sa pagtapak sa dako’ng kang-a sa politika tali kanila.
* * *
Una nilang bayloay og sulti nahitabo diha nga nagkadungan og sud sa caucus room alang sa ilang paniudto. Si Delos Santos maoy una nga nitimbaya ni Osmeña, “Di ko mao sa imong gituohan no?”
Nitubag si Osmeña “Ako ‘sab no?” Ang nisunod nila nga mga sesyon nakasaksi sa inanay nga nihukas sa sayop nilang pagtan-aw sa usa’g-usa.
Tungod sa awhag ni Konsehal James Cuenco nga bisan sa managlahi nilang partido angay’ng maghiusa ang mga konsehal, gidapit sila ni Delos Santos sa resort sa iyang pamilya sa Carmen, sa amihanang Sugbo. Nanggawas ang mga hulagway nilang duha sa social media nga nakapatumaw sa mga huhungihong sa M & M sa piniliay sa 2016.
* * *
Nisamot ang ilang kasuod nga nakaako na si Osmeña pagpangutana ni Delos Santos kun mahimo ba nga magtagbo sila uban ni kanhi mayor Tommy Osmeña.
Nitanyag si Delos Santos sa iyang pinuy-anan. Nadasig pag-ayo ang magtiayong Osmeña sa wa’y pupanagana nga pagbukas ni Delos Santos sa iyang kaugalingon.
Bisan sa di kalikayan nga mga panagana sa tanang hingtungdan, ang labing una nga pag-atubangay nilang Delos Santos ug kanhi mayor Osmeña, human sa taas ug mabulukon nilang mga engkuwentro sa nangaging mga piniliay, nilungtad og upat ka oras. Nagsugod sa alas-8 sa gabii ug nilungtad hangtud sa tungang gabii.
* * *
Natugkad ni Konsehal Osmeña ang kalidad sa panghunahuna ni Delos Santos sa una niya nga pangutana:
Nahibawo ba sa ilang panagtagbo ang mga sakop sa Bando Osmeña-Pundok Kauswagan (BO-PK)?
Mas nadasig si Osmeña sa tubag ni Delos Santos sa pangutana unsa’y mahatag sa BO-PK niya: “Gusto ko nga mag-konsehal.”
Nisunod ang konsultasyon sa nagkalainlaing sektor sa Lahug. Bisan si kanhi mayor Osmeña, nga gipasidunggan sa makinarya sa BO-PK nga nidominar sa pamolitika sa dakbayan, nibilib sa ka-organisado sa mga dumadapig ni Delos Santos.
Natunaw ang pasiuna nga tensiyon dihang gipahinumdoman sa mga lider ni Delos Santos ang kanhi mayor nga sige siya og kapilde sa ilang teritoryo. Sa labing uwahi nila nga panagtagbo sa sesyon niadtong Miyerkules, gihulagway ni Konsehal Osmeña si Delos Santos nga nialimbukad, gaan og buot ug mura’g nakuhaan sa tanang palas-unon.
- Latest
