“Plus” ug “minus” sa politika

Sa miagi nga semana nakuhaan og usa ka sakop ang Team Rama human milayat sa BOPK si Cebu City North District Councilor Mary Ann Delos Santos.

Apan nakuhaan usab og pito ka kapitan ang BOPK human kini mamalhin ngadto sa Team Rama. Mao kini ang politika -- dugang ug iban.

Unsa man ang buot ipasabot niining pagtapuntapon sa mga sakop sa partido? Pagpahaum ba kini sa ilang mga kaugalingong interest?

Ang pagtapon ni Konsehal Mary Ann Delos Santos sa BOPK ug ang pagtapon sa pito ka kapitan ngadto sa Team Rama maingon ba nato nga bintaha sa duha ka partido?

Kun sabton nato nga usa kini ka bintaha, nakabintaha ba niini karon ang Team Rama? Ang pagtapon ni Mary Ann sa BOPK nagpasabot ba kini sa iyang paghakot sa mga dumadapig ngadto sa partido nga iyang gitaponan?

Ang pagtapon sa pito ka kapitan sa Team Rama nagpasabot ba kini sa ila usab nga paghakot sa ilang mga dumadapig ngadto sa kampo ni Mayor Mike Rama?

Ang tubag niini dili. Busa kinahanglan nga dili g’yud magsalig ang duha ka partido tungod lang sa ilang nadugang.

Dili ikalimod nga ang mga kapitan daghan gayud og mga dumadapig kay sila gud ang midaog sa piniliay sa ilang barangay.

Mao pud si Mary Ann kay midaug gud siya sa pagka konsehal sa north district sa dakbayan sa Sugbo. Apan ang ilang kadaugan nakabase sa pipila ka inpluwensya.

Sila midaog kay sa personal, nauyonan g’yud sila sa mga botante. Apan ang uban sa mga botante mibotar kanila tungod sa ilang pagkasakop sa BOPK ug Team Rama.

Kini nga klaseha sa boto, atong nakita sa mga barangay nga gidominar sa duha ka partido. Busa maingon nato nga bintaha ug disbintaha ang “layat-layat” sa mga politiko.