Tukma ang gihimo sa INC

Maayo kay ang kadagkoan sa Iglesia Ni Cristo (INC) nakasabot tingali nga dili g’yud tukma ang ilang giplano unta nga protesta batok sa kagamhanan tungod lang kay gitagad sa Department of Justice (DOJ) ang gipasaka nga kaso batok sa pipila nila ka ministro.

Kamo nga mga ministro sa INC, apil ang mga sakop, timbang-timbanga g’yud usa ninyo nga dili tukma nga moprotesta kamo abi kay ang reklamo batok sa pipila ninyo ka ministro giimbestigar sa DOJ.

Sama ra gud na kun adunay mga Katoliko nga pasakaan og kaso, moreklamo ba gud ang mga Katoliko ug ang ubang relihiyon? Malipay lang kita nga wala’y kagubot nga nahitabo.

Ang kadagkoan sa kapolisan gitigum na daan ni DILG Secretary Mar Roxas nga ipatuman g’yud nila ang “maximum tolerance” aron nga malikayan ang kagubot bisan og nahinayon pa ang rally sa INC.

* * *

Uy, nakahisgot man g’yud kita ni Mar Roxas, matud ni Liberal Party Vice Chairman Feleciano Belmonte nga nagkadaghan na ang mipadayag nga mosuporta sila’ng Roxas aron mapadayon ang Tuwid na Daan.

Dugay ra man ko nga nangagpas nga kun ituboy na ni Presidente Aquino si Roxas nga maoy standard bearer sa LP sa pagka presidente mosaka g’yud ang iyang popularity rating.

Matud ni House Speaker Belmonte nga ang labing ulahi nga nakigtigum kaniya ug mipadayag og suporta para ni Roxas mao ang mga opisyal sa National Unity Party (NUP).

Nagtuo pa g’yud ko nga daghan pa’ng politiko ang mosuporta kang Roxas kun magkaduol na ang eleksyon. Kanila gud ni Roxas, Senador Grace Poe ug Vice President Binay, si Roxas ra man ang maayo.

Si Grace Poe wala’y mansa, wala malambigit og anomaliya, apan kuwang pa man gud siya og kasinatian pagdumala sa kagamhanan. Bahin ni Binay, dili na lang nato hisgotan pa kay nasayod na ang mga tawo niya.

Dinhi sa dakbayan sa Sugbo, gipahibalo kagahapon sa pipila ka kapitan nga nangangkon nga BOPK supporter sila kaniadto ug misuporta na sila karon ni Mayor Michael Rama.

Giangkon sab ni kanhi kongresista Tomas Osmeña nga ang mao nga mga kapitan iyang dumadapig kaniadto, dugay na. Bisan ako nakabantay man nga ang usa ka babaye nga kapitan sa bukid puwerte nga nakagakus-gakos ni Vice Mayor Edgar Labella.

Ang maayo lang g’yud nga bantayan ni Mayor Mike nga balimbing kaayo ning ubang kapitan. Kun tan-aw nila nga nagtakilid ka, biyaan ka dayon.