Wa’y basic salary ug benepisyo

Dear Atty. Divine;

Usa ako ka masahesta nga nagtrabaho sa usa ka massage parlor sa Cebu City. Ang akong duty gikan alas 8:30 sa buntag hangtud na sa alas 11 sa gabii. Wala mi basic nga suweldo ug commission ra ang among gidawat. Wala ‘sab mi mga benepisyo ug wa’y overtime pay. Unsa may angayan namo nga buhaton? Asa man kami moreklamo?  — Ligaya

Dear Ligaya,

Kun imong subayon ang Labor Code, daghang balaod ang posible’ng nalapas sa imong employer sama sa paghatag g’yud og minimum nga suholan, overtime pay, holiday pay, night shift, differential, 13th month pay, contribution sa SSS, Pag-ibig ug PhilHealth nga pulos mandatory g’yud sa balaod. Angay nga walo ra ka oras ang imong duty su’d sa usa ka adlaw ug kun patrabahuon ka subra sa walo ka oras, angayan na sila nga mobayad kanimo og overtime pay. Ang maayo nimo nga buhaton mao ang pagpasaka og reklamo batok sa imong employer ngadto sa Department of Labor and Employment (DOLE). Kini aron ma-imbestigar ang imong kompaniya ug makurihean kining ilang gibuhat ngadto sa ilang empleyado ug mohatag na sila og husto nga suweldo ug benepisyo. Kun  padayon mo nga magpakahilom hayan magpadayon ang maong pagpangabuso sa imong kompaniya. – Atty. Divine

Alang sa inyong pangutana may kalabutan sa problema nga legal ipadala lang sa Legal Corner sa Banat News sa V. Gullas St., Cebu City or email sa flores_divina @yahoo.com ug akong tubagon ang inyong pangutana pinaagi sa akong column matag Miyerkules ug Domingo