Ang cellphone

Ang mga moderno nga kahimanan sa komunikasyon, sama sa telepono, giingon nga nagdugtong sa kalibutan ug nag-connect sa katawhan.

Gani, mao ra og migamay ang kalibutan tungod kay sa pipila lang ka segundo atong masayran ang mga panghitabo sa ubang dapit sa kalibutan, nga sa una’ng panahon, dangtan una og pila ka adlaw usa kita masayod sa maong mga hitabo. In fact, instantly, masayran nato ang maong mga panghitabo, live, ug dihadiha dayon maka-connect kita sa buot nato nga pakighinabian gikan sa ubang dapit sa nasud  o sa tibuok kalibutan.

Apan, samtang naka-connect kini sa isig-usa kanato, at the same time, nag-disconnect usab. Sa iyang artikulo sa Panorama, si Aileen Santos miingon nga: “The gadgets (sama sa mga cellphone) that connect us also separate us.” Tinuod kaayo.

Gihulagway ang usa ka magtiayon nga nangaon sulod sa usa ka class nga restaurant, presumably nag-date, apan, ang isig-usa kanila, nag-iyahay og tulpok ug paminaw sa kaugalingon nilang mga cellphone.

Sa ato pa, gumikan sa cellphone, na-defeated ang katuyoan sa ilang pag-date. Lagmit namauli na lang sila nga wa’a g’yud seriously magka-estoryahay og dugay.

So, ang cellphone nga mo-connect unta sa isig-usa kanato, mi-separate na hinoon, sumala sa giingon dinhi ni Santos.

Sa sama nga higayon nakapawalay batasan usab kini kanato. Labing seguro, nakasinati usab kamo niining sitwasyon, diin, samtang nag-estorya ka uban sa imong higala, mokalit lang ni’g biya nimo kay motubag sa cellphone, or ikaw ang mobuhat niini.

Sa ato pa, ikaw ang ma-wala’y batasan. Unya, sulod sa simbahan, inig-konsagrasyon g’yud, mokalit ka’g tindog-biya sa simbahan, kay motubag sa cellphone. Pastilan, mas importante ang cellphone kay sa Ginoo. Kini, ug daghan pa nga mga instances diin atong mahulagway ang atong pagkawalay batasan gumikan sa cellphone.

* * *

Giingon dinhi nga may paglaum pa nga ang Freedom of Information (FOI) bill mapasar ra sa House of Representatives ug mahimo ra nga balaod.

Nindot kun mao. Apan, maora og dili molusot ang Anti-dynasty  bill. Si Speaker Sonny Belmonte namahayag nga ang FOI bill usa sa natala nga priority sa Lower House ug sa Senado nga mapasar sa dili pa ang campaign period alang sa presidential elections sunod tuig.

“Our list of priorities remains unchanged and our timetable and agenda are still the same,” matud ni Belmonte. Ang FOI bill naglangkob sa tanang  buhatan sa executive, legislative, ug judiciary, ug mga constitutional bodies.” Sa laktud, covered ang tanang buhatan sa gobiyerno.

So, huwat lang ta.