Tambag nga wala pangayoa

Nagkaguliyang ang Partido Liberal sa una’ng distrito sa lalawigan sa Sugbo tungod sa pagsulod sa mga Gullas sa ilang grupo.

Pipila ka sakop sa Partido Liberal ang wala makauyon ug miisip nga giitsapuwera ni DILG Secretary Mar Roxas nga magpapili pagka presidente sa nasud.

Kini diha nga mibisita si Mar dinhi sa Sugbo ug human ipahibalo niini nga si Kongresista Samsam Gullas na ang tsirman sa Partido Liberal sa una’ng distrito sa lalawigan sa Sugbo.

Labing naapektohan niini mao sila si Talisay City Mayor Johnny V. Delos Reyes nga magpapili pag-usab pagka mayor kontra ni Eddie Gullas ug si San Fernando Mayor Abe Canoy nga magpapili unta pagka kongresista batok ni Samsam.

Hinoon, uwahi nako nga nahibaw-an nga giklaro ni Gobernador Junjun Davide nga si Talisay City Mayor Delos Reyes gayud ang ilang suportahan ug dili pa usab final ang paghimo ni Samsam pagka tsirman sa Partido Liberal sa una’ng distrito.

Maayo nga giklaro ni Davide nga dili pa final ang pagtudlo ni Samsam tungod kay makaguba kini sa Partido Liberal ug makaiban sa boto nga makuha ni Mar Roxas sa una’ng distrito.

Giingon nga ang panaghigala sa mga Roxas ug Gullas maoy rason sa pagtudlo ni Samsam pagka tsirman apan tan-aw nako dili maayo.

Angay nga maleksyon si Roxas sa iyang gihimo ni Mike Rama. Angayan nga hinumdoman ni Roxas nga wala siya suportahi sa mga Gullas diha nga nagpapili siya pagka bise presidente.

Ang mga sakop sa Alayon dili usab kasaligan nga mosuporta kaniya tungod kay ang uban kanila mitambong usab sa partido nga nagsuporta kang bise presidente Jejomar Binay nga iyang makaatbang pag-usab sa umaabot nga eleksyon.

Mr. Secretary, unaha ang imong mga loyalist nga miyembro kay sa mga kadudahan ang motibo.