EDITORYAL – Ayaw kamo palingla

Dili angay’ng ikasuko sa mga sakop sa Iglesia Ni Cristo (INC) kun imbestigahon man sa Department of Justice (DOJ) ang kaso nga gisang-at batok sa ilang mga lider.

Bisan og imbestigahon sa DOJ ang gisang-at nga kaso batok sa ilang mga ministro wala kini makalapas sa lagda nga gilatid sa Konstitusyon nga “Separation of Church and State.”

Sama ra gud kun ang usa ka Katoliko ug sakop sa ubang relihiyon pasakaan og kaso, ang DOJ pinaagi sa fiskaliya, moimbestigar man niini. Nasuko ba ang mga Katoliko ug mipasangil nga nakalapas ang DOJ sa gilatid sa Konstitusyon?

Kinsa man diay ang moimbestigar sa pasangil nga ang pipila ka ministro sa INC nakahimo og illegal detention sa ilang mga kauban nga ministro?

Mas maisip pa gani nga kalapasan sa Separation of Church and State ang pagsalmot sa INC nga awhagon nila ang ilang mga sakop aron paluyohan ang usa ka kandidato.

Klaro kaayo nga adunay gisabwag nga sayop nga kasayuran ngadto sa mga sakop sa INC aron mosilaob ang ilang kasuko ug mosalmot sila sa protesta batok ni DOJ Secretary Leila Delima.

Ang pag-ingon nga ang DOJ miisyu na og warrant of arrest aron dakpon ang mga gireklamo nga ministro sa INC usa ka dako nga sayop kay ang DOJ dili maoy moisyu og warrant of arrest, kun dili ang hukmanan.

Igo lang ang DOJ, pinaagi sa piskaliya, nga mosuta kun may basehanan ba ang reklamo aron ipasaka kini sa hukmanan. Dili usab tukma nga ang INC mokuwestiyon nga giuna pagtagad ang kaso batok sa ilang ministro samtang wala pa mahuman ang kaso sa Mamasapano massacre.