Kabilya sa CCMC ug si Mary Ann

Ang estorya sa pagkalas ni Konsehal Mary Ann delos Santos sa Team Rama ug ang kontrobersiya sa nawala nga mga kabilya ug mga puthaw sa gipa-demolish ni Mayor Mike Rama nga Cebu City Medical Center building usa ra ug dili mahimong mabuwag.

Dihay higayon nga nagkadeperensiyahay silang Mike ug Mary Ann tungod sa estoryang wala makauyon ang kanhi kapitan sa Lahug sa pamaagi pagpa-demolish sa CCMC building ug nganong usa ka kontraktor lang ang gipatrabaho. Hangtod nga migawas ang propaganda nga si Mary Ann ang mitago sa mga kabilya ug puthaw.

Apan karong bag-o, nasakpan na gyud nga tua ra diay sa JLC Constructon ang mga scrap materials kay matud sa mga opisyal sa siyudad sa Sugbo nagsilbe kining bayad sa pagpa-demolish sa ospital.  Adunay dokumentong gisumiter ang kontraktor nga nagtug-an nga ang balor ug ekipos nga gigamit nila pagguba mikabat og P7.6 milyones (kuyawa!), samtang ang mga kabilya ug puthaw miabot lamang og P1.8 milyones.

mmiingon sa executive session nga ang “budgetary cost” sa kontraktor “after fact” na. Buot ipasabot human na ang demolisyon.

Ikaduha, nahitabo kini kay walay subasta nga gihimo ang pamunoan ni Mike. Para nako, kun may subasta pa ang pagpa-demolish sa CCMC, mahibaw-an unta nato pila g’yuy balor sa mga puthaw ug pila g’yuy angay gastohon sa demolisyon. Dili na ta makahibalo pilay alkanse sa siyudad kay gipa-demolish man daan una gipatun-an pila g’yuy gastohon.

Unya silang Poblete ug Atty. Joey Daluz nagtuo pa g’yud nga walay balor ang mga kabilya.

Karon nga nahibaw-an na asa ang mga kabilya ug puthaw, makatulog na og tarong si Mary Ann sa mga tulisok sa mga tambolero ni Mike nga nagpasangil kaniya.

Taym pa ra gud, kinsa man g’yuy tag-iya niining JLC?

Adunay nakasulti nako nga usa kini sa nagpabarog sa proyekto sa usa ka negosyante sa bukid. Kining negosyanteha nakahatag og minilyon nga tabang ngadto ni Mike sa miaging eleksiyon.

* * *

Nalipay ko nga nakasaba sa balita ang among lungsod sa Minglanilla nangindahay usab diay nga mahimong siyudad ang maong lungsod, pinaagi sa pagpanghambog sa nag-ung-ong nga reclamation project sa Tulay.

Nindot kini. Apan maayo unta nga pangandaman sa mga opisyal sa Minglanilla ang pagkahimong siyudad. Una, maayong mo-level up sa zoning tungod kay sa pagkakaron makita nato nga ang lungsod nagpatuyang nalang og panukod og mga edipisyo, apan ang standard dili pa ikasarang isip siyudad.

Laing pangandam ang trapiko nga hilabihan kahuot bisan walay karsada nga giayo tungod sa kawalay sistema nga gipatuman.

Dili makasalo sa mga problema sa usa ka siyudad kun ang saligan mao lang ang reclamation.