Reclamation projects

Kun dinhi sa dakbayan sa Sugbo ang mga Osmeña maoy naninguha nga mamugna ang mga reclamation project nga nakuwartahan sa siyudad, ang mga Ouano usab maoy counterpart niini diha sa Mandaue.

Unya diha sa Cordova, gusto usab ni Mayor Adelino Sitoy nga masunod niya ang nindot nga mga proyekto sa mga Osmeña ug sa mga Ouano.

Si kanhi mayor Serging Osmeña, papa ni Tommy Osmeña, maoy naninguha nga mamugna ang North Reclamation Area (NRA) nga anaa ang SM City ug ubang balay patigayon mahimutang.

Gisunod ni Tommy ang kalampusan sa iyang amahan ug milampos usab siya sa pagmugna sa South Reclamation Project (SRP) nga gibunyagan na karon og South Road Properties.

Sa Mandaue, lapad kaayo nga dagat gipa-reclaim usab ni kanhi mayor Alfredo Ouano, amahan ni kanhi mayor Teddy Ouano ug apohan ni Konsehal Lolypop Ouano-Dizon.

Tungod sa pagmugna og reclamation projects sa dakbayan sa Sugbo ug Mandaue nakatampo kini nga misaka g’yud ang buhis nga nakolekta matag tuig kay daghan na man nga balay-patigayon ang namugna.

Ikaduha, ang mga reclamation projects nakatampo pagsulbad sa problema sa trapiko kay anaa man diha ang karsada nga lapad kaayo og ang mga sakyanan tulin kaayo nga managan.

Pareho g’yud sila si Mandaue City Mayor Jonas Cortes ug Cebu City Mayor Michael Rama nga angay’ng magpasalamat sa mga mayor nga maoy nagmugna sa reclamation projects nga karon sila ang nakapahimulos.

Bahin ni Mayor Rama, dili gayud unta niya usik-usikan ang paggasto sa halin sa SRP pinaagi sa pagpalit og mga sakyanan nga maisip ra nga ipangsuborno sa mga opisyal sa kabarangayan. `Angay’ng gamiton gayud ang kuwarta nga halin sa SRP sa mga proyekto nga kapahimuslan sa kadaghanan, dili kay sa pipila lang ka sektor.

Diha sa Mandaue, nakadungog ko ni Lolypop nga gi-interview sa radyo nga dako kaayo ang iyang tinguha nga mapadayon ang maayo nga tinguha sa iyang apohan nga si Ingko Pedong.

Buyno, sa akong tan-aw, bisan og babaye kini si Lolypop apan masabot kaayo sa iyang sinultihan nga sensiro siya sa pagserbisyo sa mga lumolupyo sa Mandaue.

Para kanako, ganahan g’yud ko nga ang mapili nga mga opisyal mao ang mga tawo nga tarong. Wala gayud kita makadungog nga si Lolypop nalambigit og mga isyu sa kurapsyon.

Samtang, ang tawo nga nagtinguha nga moatbang kang Lolypop pagka mayor naapil ang ngalan sa gipasanginlan nga miwari-wari sa kuwarta nga gipiyal kaniya isip kongresista.

Ang ngalan sa mao nga tawo, naapil sa report sa Commission on Audit (COA). Para nako, dili g’yud maayo nga pilion ang mga tawo nga may mansa ang kadungganan.