Gilisud-lisod human mi-resign

Dear Atty. Divine,

Naa lang ko’y gusto nga mahibaw-an bahin sa akong trabaho. Nagtrabaho ko isip pharmacist sa usa sa dako’ng pharmacy sa nasud. Sulod sa 14 ka tuig, diha ko nadestino sa Cebu ug gibalhin ko diri sa Negros niadtong 2003. Gi-promote ko pagka assistant manager, dayon as manager niadtong October 29, 2014. But I tendered my resignation kay nadawat ko sa government hospital ug wala ko nila hatagi og employment certificate. Ilang gi-hold ang akong leave credits, 13th month pay ug ang akong last salary. Until now wala ko hatagi niini nga mga incentives ug sa akong length of service. Akong pangutana attorney, unsa may makuha nako sa company isip empleyado ug unsa ang akong himoon para mapadali nako og kuha ang akong hinagoan? — Mayet

Dear Mayet,

Bisan kun ikaw regular na nga empleyado, may katungod ka gihapon nga mo-resign sa kompaniya. Ubos sa atong balaod, mahimo ka nga mo-resign apan kinahanglan ‘sab nga mohatag ka og 30-day notice sa imong employer aron usab sila mahatagan og igong higayon sa pagpangita og hulip kanimo. Ang una nimo nga buhaton karon mao ang pagpakigsulti sa HR sa imong previous employer kay basin aduna lang kay angay i-comply nga mga requirements aron mahatag ang imong suweldo, 13th month pay ug uban pa. Base sa balaod kun ikaw boluntaryo nga mo-resign entitled ka nga modawat sa imong last nga suweldo ug sa imong 13th month pay depende kun pila ka buwan ka nga nakaserbisyo sa maong tuig. Kanang leave credits ug length of service dili na mandatory busa depende ra kana sa kompaniya kun mao ba kini ilang practice nga mohatag niini isip pabawon sa iyang mga empleyado nga mobiya. Kun dili g’yud madala og hangyo ang imong employer, then mopasaka ka na lang og reklamo ngadto sa NLRC tungod sa wala nila pag-release sa imong suweldo ug sa imong 13th month pay ug sa pagdumili paghatag kanimo og Employment Certificate ug uban pa nga benepisyo nga sagad ihatag sa kompaniya sa ilang mga empleyado. - Atty. Divine