Ten years na

Pagkadali ra g’yud mosibog sa panahon kay 10 na man diay ka tuig gikan sa pagsugod nako pagsulat sa Banat News niining akong sinemana nga lindog – Nagbaga’ng Kasayuran.

Napulo ka tuig sa pagpaambit sa mahinungdanong fire safety tips aron maluwas o makalikay kita sa sunog, kun unsa’y buhaton panahon sa sunog nga moigo sa usa ka lugar ug uban pa nga kasayuran gikan sa kabomberohan.

Tingali, daghan ‘sab nga nahibaw-an ang publiko. Apan bisan pa og balikbalikon pa nato ang pagpatik sa mga pahimangno unya wala’y pagpakabana ang publiko, mabiktima gihapon kita sa sunog.

Dinhi nato makita ang ka importante sa pagpakabana sa publiko aron magmalampuson ang tanang programa sa atong kabomberohan.

Dili moabot og 10 ka tuig ang Nagbaga’ng Kasayuran kun wala’y nagsunod ug nagbasa niini. Gani daghan ko og mga feedbacks ug mga sugyot nga nadawat pinaagi sa email sa mga topics nga buot nila pahisgotan kanako.

Sa padayong nagsunod niini ug mihatag sa ilang mga reaksyon, daghang salamat. Salamat ‘sab sa tagdumala sa Banat News nga gihatagan ko og luna alang sa akong lindog.

Pasalamat nako kang Sir Juanito Jabat nga maoy nahimo nako nga mentor sa pagsulat ug maoy mihatag og Go Signal nga mapatik ang Nagbaga’ng Kasayuran sukad niadtong Agosto 2005.

Salamat sa akong Banat family. Akong lauman nga makasulat pa ako ug mapatik pa ang akong mga lindog sa mosunod pa nga laing napulo ka tuig.

* * *

Sa katapusan, tugoti ko sa pag-greet og advance Happy Birthday sa akong pinangga nga inahan nga si Dinah Villanueva  nga magsaulog sa iyang adlaw’ng natawhan karong September 1, 2015. Happy Birthday Ma!