EDITORYAL - Balikbayan Boxes

Maayo nga nausab dayon ang baruganan ni PNoy ug gibakwi iyang unang pamahayag nga daw nidapig pa sa Bureau of Customs bahin sa  gireklamong random inspections sa mga balikbayan boxes sa mga overseas Filipino workers (OFWs) ug migrant workers.

 Kapin sa 36 milyones ka netizens ang misaway sa BOC bahin niini, kini nga pwersa nakapausab sa baruganan ni Aquino kinsa mimando nga ipahunong ang maong polisiya sa BOC.  Maayo kini nga lakang kay hapit na ang eleksyon.

Hasta ba diay ang atong mga “Bagong Bayani” dudahan pa nilang mga smugglers? Mas nabaniog pa man siguro sa mga balita nga dunay smugglers diha sa BOC nungka sa mga skilled workers nga nanarbaho sa ubang nasud alang sa ilang mga pamilya dinhi.

Unsa may kontrabando anang pipila ka mga de lata, chocolates, mga sapot, gamit ug duwaan sa mga bata ug pipila ka buok nga gadgets nga maayo na lang magamit sa ilang mga minahal sa kinabuhi dinhi nga dili maka-afford ana dinhi?

Tinuod taxable man ang ubang mga butang kun ipasud dinhi sa nasud, apan angay pa bang daginoton kini sa BOC? Didto pa lang sa mga nasud diin kini gikan gipabayad na man og buhis ang nagpadala niini?

Kaniadto pa dili maayo og reputasyon sa publiko ang BOC, mao nga di mosalig kanila ang publiko nga pang-ukayon ang mga balikbayan boxes.

May hustisya ba kaha nga mapaabot kun dunay mawagtang sa ilang gipadala?  Kini lang nga pangutana ang taga BOC mismo maglisod og pasalig nga ila kining mahatag.

Kun ipamugos kini sa BOC kay lagi ilaha man kuno kining trabaho, mas maayong kombinsihon una nila ang publiko nga sila kasaligan. Ang ubang OFWs nga dili tanto dagko og sweldo, maabtan og tagtulo ka buwan una nila mapuno ug mapadala ang usa ka balikbayan box dinhi sa ilang pamilya.

Busa, sakit kaayo alang kanila nga ukayon sa mga dili kasaligang mga tawo ang ilang gihagoan nga puno sa pagmahal para sa ilang pamilya kay wa man na gipamunit ang gipangsulod.